E vazhdojmë traditën

Kultura

E vazhdojmë traditën

Nga: Zymer Mehani Më: 28 prill 2021 Në ora: 10:50
Zymer Mehani

Nuk kemi nevojë për gjëra të shëmtuara

As për miq e shokë me fytyra të maskuara

As për vëllezër e motra me zemër të brishtë

Që ecën të pasigurtë me hapa të trishtë

 

Jo, as për lëvdata e dekorata nevojë s’kemi

Ngase ishim e do të jemi, vetëm këta që jemi

Nuk na nevojiten fjalët me pompozitet

Se edhe pas shpinës, dëgjojmë plot, sa një det

 

Por ne, o miqt të dashur, në jetë e kemi parim

Që kokën s’e kthejmë pas, as prapa s’bëjmë kthim

Ecim bashkë me kohën, hapat i qesim përpara

Jo s’kemi komplekse, shqetësime, as andralla

 

“Më munde, të munda” me tonin s’bëjmë gara

Si ju jemi njerëz, të tërë të rëndomtë, të thjeshtë

Por të zezës e bardhë, jo s’i themi dot n’jetë

Nuk i thamë as dje, s’i themi as sot, as mot

Dijeni se kemi fjalë e besë, që s’i thyejmë dot

 

Mbretër e gjeneralë për punët tonat vetë jemi

Jemi miq e vëllezër me ata që pranë i kemi

Por dhe me ata që larg në mërgim janë

Respekt dhe nderime, të gjithë i admirojmë

E vazhdojmë traditën, shqiptarisht jetojmë

commentFirst article
Sot mund të lexoni Shfletoni kopertinat