Mbesës qumështore ëmbëloshe …

Kultura

Mbesës qumështore ëmbëloshe …

Nga: Albert Habazaj Më: 27 shtator 2021 Në ora: 13:02
Mbesa

Mes padurimit e ankthit

Lajm me mjaltë vjen nga Tirana,

Porsi Shpirt me yll të fatit,

Vjen bebushja, siç vjen zana.

Si frymë e pastër vese,

Aromë qumështi e ngrohtë,

Amaris, gjyshi të keqen,

Ç’ëmbëlsira më ra në shportë!

Këtë çast, si një kupë

Gëzimtarie sa prita,

Fati prapë na fali çupë,

Sydrenush’ me shtatë drita.

Sa paradite e bukur

Kjo e 23 Shtatorit

Zemra ime lulembushur

Mrekullinë për dore mori…

Më kuptoni se si dukem,

Si në fron të Perandorit.

Me dritën e lules futem,

Nëpër rreze diellori.

Gufon zemra, qesh si zog,

Perla seç m’u bë me motër,

Mbret si unë kush është sot,

Ngjyrë floriri marrkan lotët…

Amaris, që sapo erdhe

Si muzikë e dashur kënge

Ëmbëloshe, si lëng shege,

E bukur, si ëndërr hëne…

Sot mund të lexoni Shfletoni kopertinat