A të kujtohet Kosovë,
Klithma e buzëve të fëmijëve
Që era ua thante shkumën e njomë
A t’kujtohen lutjet e nënave qëndrestare
Në prehërin e tyre binin si gjethe të thara.
A të kujtohet Kosovë,
Ajo flaka e orëve të mbaruara
Me jetëra n’mes zjarrëve e rrethuar
Në rrethin e hekurt të gojës së patkoit
Plot yje ndriqonin me gjoksin e shpuar.
Sot diçka në mes buzëve po dridhet
Stuhija kombanat e trishtimit po i josh,
Si do të shkosh rrugës që askund nuk shpie
Rrugëtimin tënd një urthi e gërryen tinëza
Dhe një perde të zezë po i vë në bebëza.
