Diku në Malësi, njëherë me një zaman,
Vunë bashkëpunim Maloku me Shejtan.
U përqafuan fort, me lidhjen shoqërore,
Tu hyjnë punëve, që u shkojnë për dore.
- Do bëjmë bujqësi,- tha Shejtani krenar,
Të punojmë mirë me shat e lopatë në arë.
Zgjedh unë i pari, me përvojë në financë,
Ti mbrapa më ndjek si partner në aleancë.
- Çka mbin mbi tokë, krejt është për mua,
Nën tokë me kësmet, është për ty, si thua?
- Pajtohem! - tha Maloku, me buzë në gaz,
Sepse e dinte, çfarë mund të pjell më pas!
Mbollën patate, të cilat çelën sikur kurorë,
Shejtani me gëzim i numëronte kungullorë.
Mendonte në vjeshtë do ta gëzonte bereqeti,
Por, mbi tokë ka lule, nuk e dinte i shkreti.
Kur erdhi vjeshta, çfarë shohin sytë në kokë,
Lulet u vyshkën u thanë, gjethet ranë në tokë.
Maloku nën tokë, mbushte thasët pa pushim,
Patate sa koka, i mblidhte me plot ngazëllim.
Shejtani nga inati u skuq sikur speci në skarë,
Malok! - Me këtë mashtrim s’mbaron kjo garë!
Vitin e ardhshëm, do të mbjellim lakra shumë,
- Në rregull! - tha Maloku, vetëm të ketë punë.
Kësaj radhe Shejtani, zgjodhi nën tokë fitimin,
Por, Maloku përsëri me hile i nguli mashtrimin.
Kur e pa se kështu, nuk po i shkon partneriteti,
Vendosi t’i kërkoj mejdan si burrat nga vilajeti.
Në dhomën me dy shkopinj: i gjatë e i shkurtë,
Shejtani të gjatin e merr, si me qenë burrë i urtë.
Por, kur ngre shkopin lart, në tavan i zë për dreq,
Nuk gjuan dot Malokun, vetëm vetes i bën keq.
- Nuk mjafton kjo!” - tha Shejtani, “Dalim n’oborr,
Ku liria është n’horizont e s’ka as tavan, as korridor”
- Do të marrë shkopin e shkurtër!- tha Shejtani sot,
Por, Maloku nga larg e godiste, si me raketë pa pilot.
Në fund, u ul Shejtani dhe u bë si pulë e lagur në shi,
Kuptoi me Malokun, s’e ka lehtë të merret me tregti.
Se ku ka mend e rrënjë, s’mbijnë dot hilet siç thonë,
E hileqarit, nuk i shkon kungulli, mbi ujë gjithmonë!
Ata që luajnë me dredhi, shkon e u del boja në shesh,
U varet humbja e turpit kalavesh, sikur vathi në vesh.
Me Malokun nuk ka hajgare dhe as dredhi me taktikë,
Se të vjen pas shpine, me nder jush, shkopi si kamxhik!