Dhia në karrocë

Kultura

Dhia në karrocë

Sevdail Hyseni Nga Sevdail Hyseni Më 23 gusht 2025 Në ora: 12:13
Foto ilustrim

Në pranverë blinte dhinë qumështore,
pastaj e therte për pastërma dimërore.
Kështu vepronte për çdo vit pandarë,
derisa një dhi i doli e sojit të mbarë.

Vendosi ta ruante kafshën me kënaqësi,
mirëpo katundi e kishte një hall të zi.
Ekzistonte i vetëm një cjap për çiftim,
ku banorët përballeshin me shqetësim.

Meqë nuk ecte gjatë kjo farë beronjë,
e dërgon me karrocë te cjapi si zonjë.
Pastaj e pyet pronarin, ashtu kureshtar,
si ta dijë që dhia ka mbetur me barrë.

– Në mëngjes, nëse han ka majtas posi,
nëse veç përtypet, ta sjellësh përsëri.
Të nesërmen e shohin me shqetësim,
e merr n’karrocë, e çon për ndërzim.

Për të tretën ditë, burri plot me merak,
i thotë gruas së dashur për të dalë pak:
– Të shohim si na duket dhia kësaj radhe,
a po han, a po përtypet kjo lozonjare?

Gruaja kthehet e qetë, por e brengosur,
me lajme të hidhura që s’kanë të sosur:
– As nuk po han, e as nuk po përtypet,
hipur në karrocë po rri, pret të përçitet!

Burrit i ra në kokë rrufeja për së thati,
e mendonte i heshtur: “Si më zuri taksirati?”
I mërzitur dhe i rraskapitur sillet tërthor,
me padurim po pret sezonin dimëror!

comment Për komente lëvizni më poshtë
Sot mund të lexoni Shfletoni kopertinat