Flamur në stuhi

Kultura

Flamur në stuhi

Nga: Arif Ejupi Më: 5 shkurt 2026 Në ora: 19:41
Arif Ejupi

Zemrën e kishe gurëthyes
që dhembjen bluan,
ujëvarë që plagën pastron.

Frikën e pate vrarë në djep,
guximin ua pate rrëmbyer luanëve.

Syrin e kishe dylbi,
dorën shigjetë, që shponte tej për tej.

Vdekjen e bëre me armë në duar, duke zanuar
ata që mendonin se Kosovën e shndërruan në
Shumadi.

Shumëherë pate thënë:
“ Në vdeksha pa marrë hak për ty, Kosovë,
mos qofsha biri yt. ”

Betimi kurrë nuk të mbeti peng.

Ishe e mbete kandil mbi Gallap e Pashtrik!

comment Për komente lëvizni më poshtë
Sot mund të lexoni Shfletoni kopertinat