Dashuria njëditore

Kultura

Dashuria njëditore

Nga: Sevdail Hyseni Më: 14 shkurt 2026 Në ora: 13:18
Foto ilustrim

S’jemi më dashnorë Venediku,
me aventura romantike çdo ditë.
Dashuria lind në shikim të parë,
dhe prishet në shikim të dytë.

Më 14 shkurt, qyteti vishet kuq,
gjithandej dhurata e përqafime.
Shpërthejnë dashuriçkat me stil,
një ditë “zemra ime” - “jeta ime”!

Thonë: “Dita e të dashuruarve”,
pse u shpik pikërisht në këtë datë?
A pulson zemra sipas kalendarit,
apo ndjenjat shijohen me afat?

Nëse dashuria është e përditshme,
pa tullumbace, zhurmë e shfaqje,
ndoshta s’ka nevojë për 14 shkurt,
të dashurohemi vetëm për sy e faqe.

Dashuria s’është diçka që zhduket,
as dhuratë që harrohet nëpër sirtar,
por një festë më shumë në motmot
s’është për t’u dukur, as për t’u parë!

comment Për komente lëvizni më poshtë
Sot mund të lexoni Shfletoni kopertinat