Gënjeshtra

Kultura

Gënjeshtra

Nga: Xhelal Hoxha Më: 1 prill 2026 Në ora: 09:48
Xhelal Hoxha

“Mos na ban fort kajde,

hajde, mori rrenë, hajde…”

Krijim popullor për gënjeshtrën

dhe gënjeshtarët,

që gjithmonë i kanë pasur

e do t’i kenë këmbët e shkurtra,

e hundën dhe veshët e gjatë.)

 

Pse, mori gënjeshtër,

gënjen të tjerët e edhe veten tënde?

Kur këmbët shpesh i ke aq të shkurtra,

je çalamane, besa-besë,

je belbane e mjerane.

Haj e vaj halli për ty —

njerëzve çka u bane?!…

 

I zhveshe krejt prej vetvetes së tyre,

i ç’njerëzove deri në palcë;

ua hoqe maskat prej fytyrës së vërtetë,

sepse ua rrëmbeve njerëzinë,

dinjitetin dhe moralin,

e i le pa asgjë e pa gjë

në këtë jetë!…

 

Ndonëse gjithmonë i le

“si të gjymtë” e të mjerë,

krejtësisht e plotësisht,

me vetëdije e me behane,

prapë je e njëjta —

si në dimër, ashtu edhe në verë.

Të gjitha këto i bëre

për të zezën e kokës tënde.

Mori, qofsh fatzezë,

e mbetsh gjithmonë virane;

heu, mos të pafsha kurrë,

as zërin mos ta ndiejsha më!…

comment Për komente lëvizni më poshtë
Sot mund të lexoni Shfletoni kopertinat