Bashkëbisedim familjarë dikur…

Kultura

Bashkëbisedim familjarë dikur…

Nga: Xhelal Hoxha Më: 18 prill 2026 Në ora: 10:50
Xhelal Hoxha

Im at, Hemi:

“Biro, qofsh gjithmonë me shëndet e jetë të gjatë!

Paçi fatin e mirë dhe të mbarë!

Puno si njeri, me dinjitet e ndërgjegje.

Mos lëndo, mos mashtro e mos tradhto askënd!”

Mixha Faik:

“Qëndro në vendin ton, punoni për të.

Mos ki frikë nga askush,

që kjo tokë e larë me gjak e lot

të ketë rend, ligj, shtet e Zot!”

Axha Can:

“Djalë, vendos vetë çka bën.

Dëgjo zërin e zemrës dhe të mendjes.

Por kujto fjalët e të mençurve,

se në fund, je e zeza e kresë tënde.”

Baca Lush:

“Mos dëgjo askënd, puno me krye tënd.

Ruaju siç thotë populli: ‘Se shkon si qeni n ’rrush!’”

Baca Lam:

“Mos e bjer punën ngushtë, mos leh si qeni i keq.

Sa të duash të jesh azgan, kurrgjë nuk mund të bën,

veçse mbetesh një askush dhe je e zeza e fatit tënd.”

Ime ëmë, Mira:

“Bëhu i mirë, biri im.

Mos u nxin me fjalët e të tjerëve.

Mos bjerë në bela me askënd.

Fjalën e fundit kurrë mos e qit të parë.

Çka të vie në dorë, mos e bëj pa menduar,

sepse shpejt mund të pendohesh.”

comment Për komente lëvizni më poshtë
Sot mund të lexoni Shfletoni kopertinat