Në botë karnavalet mbahen veç një herë në vit,
Kurse te ne zgjedhjet zhvillohen pa asnjë limit.
Sapo qytetarët nisin fushatën që ta harrojnë,
Politikanët prapë me zhurmë skenën e pushtojnë.
Në këtë teatër absurd, qytetari bie në zhgënjim,
kujton zgjedhjet, pa u tharë boja në fletëvotim.
Po sikur të ishte kompromisi disiplinë olimpike,
vendi do të fitonte medalje në bojkotime historike.
Fjala "kompromis" trajtohet si specie e rrezikuar,
ndërsa "zgjedhjet e reja" janë mall i shumëkërkuar.
Me këtë ritëm ua kalojmë edhe katër stinëve në vit,
se votojmë aq shpesh, sa liderët tanë nuk i mërzit.
Mbase karnavali është i bukur për sy e për veshë,
atëherë kur nuk zgjat më shumë se një ditë në shesh.
E kur maskat s’hiqen e premtimet s'kanë mbarim,
shteti nuk ndërtohet me fjalë, por me mirëkuptim.
Prandaj, mjaft me këtë valle që na ndjek hap pas hapi,
e na sjell te kutitë, sa herë kur i prishet dikujt hesapi.
Se populli s’ka nevojë për një tjetër proces - verbal,
Por, për një vend normal... e jo për “karnaval”!()