Vapa

Kultura

Vapa

Nga: Sevdail Hyseni Më: 1 korrik 2026 Në ora: 10:42
Fotoilustrim

Populli, nën hije

të një kumbulle të tharë,
pret reshjet si pensionisti

pagën e parë.

Në Tiranë protesta,

në Prishtinë debate,
dikush kërkon zgjedhje,

dikush mandate.


Në studio televizive,

kravatat me lara,
analistët piqen

si specat në ara.


Inflacioni fryhet

si kulaçi e bakllavaja,
çmimet vallëzojnë

si nipat te daja.
 

Ndërkohë, meteorologu

del me nxitim:
"Nesër priten reshje

madje dhe freskim!"
 

Populli gëzohet,

hap dritare me kënaqësi,
Por reshja vjen me tre pika shi,
sa për të bërë një fotografi.

Prandaj rrimë e qeshim,

se ç'të bëjmë tjetër,
në këtë teatër

me skenar të vjetër.

Politika zien poshtë,

qielli digjet lart,

e populli, si gjithmonë,

pret një ditë me fat!

Sot mund të lexoni Shfletoni kopertinat