Vjeshtën e këtij viti,
do ta mbajmë në mend,
për zgjedhjet kombëtare
si dhe për parlament.
Tani zgjohet Lugina
nga gjumi i verës,
na erdhën zgjedhjet,
mu te pragu i derës.
Unitetin që s’e kemi
do ta bëjmë rutinë,
fluturim për n’Tiranë,
turr e vrap n’Prishtinë.
Të kërkojmë një front
për shpëtim kombëtar,
mu ashtu siç thotë urtia:
- Prit, gomar, të mbijë bar!
Presheva me rrethinë,
rreth sofrës e përçarë.
Sot bashkohet për deputet,
nesër ndahet për këshilltarë.
S’mund të kërkosh unitet,
as koordinime parciale,
të bësh një hap përpara
nga ambicia personale.
Sepse, në fund të fundit,
problemi s’është i pashëruar,
janë interesat personale,
që s’i bëjnë të bashkuar.
Ndaj, një votë e njësuar
bëhet zë i fortë, pykë;
ndërsa vota e copëtuar,
mbetet vetëm statistikë.
