Nuk është leht
të jesh president,
drejtësia të pret,
n’derë me dekret!
Vota të ngre lart,
me pushtet të vesh,
të jep një kolltuk
të veshur me lesh.
Të vë flamurin,
rojet me eskortë,
por s’të bën mbret
e as mbi shtet Zot!
Se ligji s’është qilim
që shtrohet për këmbë,
as Kushtetuta një libër
që flet nëpër dhëmbë.
Sado lart të ngjitesh
në fronin madhështor,
kur vjen puna te ligji,
s’ka titull me kurorë!
Nëse ngrihen dyshime,
mos u bëj i shastisur,
as mos e quaj drejtësinë
armik të kurdisur.
Nëse je i pastër,
s’ke frikë nga drita,
mbase e vërteta
s’ka nevojë për prita.
Por, nëse mendon
se posti të jep imunitet,
kujdes, se edhe hija jote
kërkon llogari në shtet!