Taylor Swift ka shprehur lehtësimin e saj që të qenit e lumtur në jetën personale nuk ndikoi aftësinë e saj për të shkruar këngë për albumin e ri The Life of a Showgirl.
“Dikur kisha këtë frikë të errët, se nëse një ditë do të isha me të vërtetë e lumtur dhe e lirë, duke qenë vetvetja dhe e përkujdesur nga një marrëdhënie, çfarë do të ndodhte nëse frymëzimi për të shkruar do të thahej?” – tha ajo për BBC Radio 1.
Swift foli gjithashtu për fejesën e saj me yllin e NFL, Travis Kelce, rikthimin e master–regjistrimeve të saj, turneun botëror “Eras” dhe dashurinë për pjekjen.
Fansat kanë filluar ta dëgjojnë albumin që nga publikimi i tij në orët e hershme të mëngjesit, me disa që raportuan se Spotify për pak kohë u mbingarkua nga kërkesa.
Albumi i ri përfshin një këngë që përdor elemente nga kënga e George Michael, Father Figure. Trashëgimia e këngëtarit të ndjerë tha se ishin “të lumtur” kur Swift iu drejtua për ta përdorur.
“Kur dëgjuam këngën nuk patëm asnjë hezitim për këtë bashkim mes dy artistëve të mëdhenj dhe e dimë se edhe George do ta ishte ndjerë njësoj”, kanë shkruar në Facebook përfaqësuesit e tij.
Një tjetër këngë e albumit, Actually Romantic, nxiti spekulime se ishte një ‘diss–track’ ndaj Charli XCX. Por të tjerë i kanë hedhur poshtë këto zëra, duke kujtuar se Swift vitin e kaluar kishte thënë se ishte “e mahnitur” nga puna e Charli XCX dhe e kishte lavdëruar muzikën e saj si “surreale dhe shpikëse”.
