Shënohet ‘Festa e Abetares’ në Mitrovicë - Bota Sot
Shënohet ‘Festa e Abetares’ në Mitrovicë

Mitrovica

E hënë, 22 tetor 2018

Shënohet ‘Festa e Abetares’ në Mitrovicë

Më: 17 maj 2018 Në ora: 13:39
‘Festa e Abetares’ në Mitrovicë

Qyteti i Mitrovicës sot ishte nikoqire e manifestimit mbarëkombëtar ‘Festa e Abetares’ të organizuar nga Ministria e Arsimit, Shkencës dhe Teknologjisë (MASHT), ku përveç pjesëmarrësve nga qytetet e ndryshme të Kosovës, të pranishëm ishin edhe fëmijët nga Shqipëria dhe Lugina e Preshevës.

Zëvendësministri i MASHT-it, Heset Sahiti, tha se kjo është një festë jo vetëm e fëmijëve që sot e përmbyllin me sukses mësimin e shkronjave, dhe jo vetëm e mësuesve që kurorëzojnë punën e tyre një vjeçare me këta nxënës, por është festë edhe për prindërit që i gëzohen përfitimit të shkathtësisë jetike të fëmijëve të tyre, siç është shkrim-leximi.

Sahiti: Është një festë për të gjithë ne

“Është një festë për të gjithë ne, si shtet dhe si komb, sepse një gjeneratë e tërë po e fillon udhëtimin e tyre shtigjeve të dijes. Përgëzime për këta fëmijë që sot dinë të shkruajnë e të lexojnë, përgëzime për mësimdhënësit dhe prindërit e tyre dhe gëzim për MASHT-in dhe Republikën e Kosovës, sepse po përgatitim brezin e ri që do të zhvillojë dhe ndërtoj të ardhmen tonë të përbashkët dhe të ndritur”, ka thënë Sahiti.

Kryetari i Mitrovicës, Agim Bahtiri, e ka quajtur ‘Festën e Abetares’ si festën më të dashur, ngase, siç tha ai, fëmijët janë dashuria, e sotmja dhe e ardhmja e Kosovës.

Bahtiri: Nxënësit tonë po hynë në një kapitull të ri të jetës

“Sot nga kjo festë e madhe, nxënësit tonë po hynë në një kapitull të ri të jetës së tyre në universin e madh të dijes, në botën e madhe të librit dhe shkencës”, theksoi Bahtiri.

Përfaqësuesi nga Shqipëria, Petrit Zeneli, e ka quajtur arritjen më të madhe në fushën e arsimit dhe në të gjitha trevat shqiptare, modifikimin e abetares.

Zeneli: Ka arritje të mëdha në fushën e arsimit

“Në fushën e arsimit qoftë në Shqipëri, qoftë në Kosovë, ka arritje të mëdha, dhe një ndër arritjet më të mëdha në fushën e arsimit ku ka troje shqiptare është modifikimi i Abetares shkronjë për shkronjë”, tha Zeneli.

Ndërkaq, përfaqësuesi nga Lugina e Preshevës, Mentor Nuriu, ka potencuar se fëmijët janë ata të cilët me dijet e tyre motivojnë mësuesit për misionin e tyre që bëjnë.

Nuriu: Na motivon profesioni i mësuesit

“Ju fëmijë, fatosa, të cilët i përfunduat këto shkronja të arta që do t’ju shërbejnë gjatë gjithë jetës për t’ju orientuar dhe ngritur nivelet e dijeve tuaja, neve mësuesve na motivon edhe më shumë misioni i të qenit mësues”, tha ai.

Ndryshe, para të pranishmëve të këtij manifestimi fëmijët shfaqën një program me poezi për shkronjat dhe poezi tjera, këngë dhe të ngjashme. 

Sot mund të lexoni Shfletoni kopertinat
Sondazh
test