​Kurti priti në takim presidenten e BERZH-it Odile Renaud Basso

Aktuale

​Kurti priti në takim presidenten e BERZH-it Odile Renaud Basso

Më: 12 prill 2022 Në ora: 20:51
Foto nga takimi

Kryeministri Albin Kurti priti sot në takim presidenten e Bankës Evropiane për Zhvillim dhe Rindërtim (BERZH), Odile Renaud Basso, me ç’rast u bisedua mbi bashkëpunimin reciprok dhe projektet në zbatim.

Kurti foli për masat e reja të Pakos së Ringjalljes Ekonomike nga të cilat do të përfitojnë rreth 800 mijë qytetarë si dhe planet për rritjen e pagës minimale në 264 euro bruto, që do të konkretizohen nesër në mbledhjen e qeverisë me rastin e miratimit të projektligjit që i hap rrugë një gjëje të tillë.

Në takim u diskutua edhe për Strategjinë e re të Energjisë, e cila është drejt finalizimit dhe për potencialin e vendit për prodhimin e energjisë elektrike nga burimet e ripërtërirë, thuhet në komunikatë.

Ndërsa, presidentja Basso tha se BERZH-i është i interesuar për të bërë edhe më shumë në fushën e energjisë së ripërtërirë, eficiencës së energjisë, zhvillimit të mëtejshëm të infrastrukturës, si dhe në përkrahjen e sektorit privat në Kosovë.

Në fund të takimit, ministri i Financave, Punës dhe Transfereve, Hekuran Murati nënshkroi me BERZH-in Marrëveshjen e Kredisë për projektin “Korniza e Qyteteve të Gjelbra 2 Dritarja 2 – Eficienca e energjisë në ndërtesat publike në Prishtinë".

Të nderuar lexues të gazetës “Bota sot”, komentet që përmbajnë fyerje, ofendime dhe sharje nuk lejohen në portal. Andaj, komentet e juaja do të kalojnë në filtra për aprovim dhe të tillat që përmbajnë gjuhë që nuk përkon me rregullat, nuk do të aprovohen. Ju faleminderit.
Sot mund të lexoni Shfletoni kopertinat