Zyra e Prokurorit të Specializuar (ZPS) ka kërkuar që mbrojtjes së Hashim Thaçit, Kadri Veselit, Jakup Krasniqit dhe Rexhep Selimit, t’iu refuzohen kërkesat për leje për ankesë ndaj vendimit mbi kornizën për trajtimin e informacionit konfidencial dhe kontaktit me dëshmitarë.
Kjo është bërë e ditur përmes parashtresave të ZPS-së, të publikuara në faqen zyrtare të Dhomave të Specializuara.
Sipas prokurorisë, kërkesa e Veselit duhet të refuzohet sepse nuk i plotëson kushtet për leje për ankesë sipas nenit 45 të Ligjit dhe rregullit 77 të Rregullores.
“Veseli nuk demonstron se asnjë nga çështjet që pretendojnë për gabime në Vendim plotëson pragun e rreptë për certifikimit. Asnjë nga çështjet e ngritura nuk përbën çështje të apelueshme sipas kuptimit të nenit 45 dhe rregullës 77, dhe Veseli gjithashtu qartazi dështon të përmbushë barrën e tij në lidhje me anën e dytë dhe të tretë të testit”, thuhet nga ZPS.
Po ashtu, prokuroria ka pretenduar se kërkesa e Thaçit duhet të refuzohet sepse nuk i plotëson kushtet për leje për ankesë sipas nenit 45 të Ligjit dhe rregullës 77 të Rregullores.
Sipas tyre, mbrojtja e Thaçit nuk demonstron se ndonjë nga çështjet që pretendojnë për gabime në vendim e plotëson pragun e rreptë për certifikimit.
“Kërkesa e Selimit duhet të refuzohet sepse nuk i plotëson kushtet për leje për ankesë sipas nenit 45 të Ligjit dhe rregullit 77 të Rregullores. Selimi nuk demonstron se asnjë nga çështjet që pretendojnë për gabime në Vendim e plotëson pragun e rreptë për certifikim”, thuhet për kërkesën e mbrojtjes së Rexhep Selimit.
Njëjtë thuhet edhe për kërkesën e mbrojtjes së Krasniqit, pasi sipas tyre e njëjta duhet të refuzohet sepse nuk i plotëson kushtet për leje për ankesë sipas nenit 45 të Ligjit dhe rregullit 77 të Rregullores.
“Krasniqi nuk demonstron se asnjë nga çështjet që pretendojnë për gabime në Vendim e plotëson pragun e rreptë për certifikim. Çështjet e supozuara janë të pamjaftueshme diskrete dhe/ose keqinterpretojnë Vendimin, dhe Krasniqi gjithashtu nuk arrin të përmbushë barrën e tij në lidhje me anët e dyta dhe të treta të testit të certifikimit”, thuhet nga prokuroria, shkruan BetimipërDrejtësi.
Ndryshe, më 29 prill, Zyra e Prokurorit të Specializuar ka dorëzuar një aktakuzë të ndryshuar ndaj Hashim Thaçit, Kadri Veselit, Rexhep Selimit e Jakup Krasniqit.
Prokuroria po pretendon se katër të akuzuarit kanë kryer krime lufte edhe në Gjilan, Budakovë e Semetishtë.
Në aneksin e publikuar sa i përket krimeve që pretendohen se ndodhën në Semetishtë dhe Budakovë, prokuroria ka listuar krimet e luftës si arrestimi dhe ndalimi i paligjshëm ose arbitrar, trajtim mizor ose çnjerëzor, torturë, vrasje. Ndërkaq, si krime kundër njerëzimit i ka listuar burgimin, vepra të tjera çnjerëzore, torturën, vrasjen, zhdukjen e personave me forcë dhe persekutimin.
Kurse, për krimet që pretendon që ndodhën në Gjilan, si krime lufte i ka listuar arrestimi dhe ndalimin e paligjshëm ose arbitrar, trajtimin mizor ose çnjerëzor, torturën dhe vrasjen. Ndërsa, si krime kundër njerëzimit ka listuar burgimin, vepra të tjera çnjerëzore, torturën, vrasjen dhe persekutimin.
Më 9 nëntor të vitit 2020, në paraqitjet e tyre të para, Jakup Krasniqi e Hashim Thaçi janë deklaruar të pafajshëm për akuzat që u vihen në barrë.
Njëjtë është deklaruar edhe Veseli në paraqitjen e tij më 10 nëntor, sikurse edhe Selimi më 11 nëntor.
Aktakuza ndaj Hashim Thaçit, Kadri Veselit, Rexhep Selimit dhe Jakup Krasniqit është konfirmuar më 26 tetor 2020
Sipas akuzcs, së paku midis marsit 1998 deri në shtator 1999, Hashim Thaçi, Kadri Veseli, Rexhep Selimi, Jakup Krasniqi dhe anëtarë të tjerë të ndërmarrjes kriminale të përbashkët kishin qëllimin e përbashkët për të siguruar dhe ushtruar kontroll mbi të gjithë Kosovën përmes metodave që përfshinin frikësimin, keqtrajtimin, ushtrimin e dhunës dhe eliminimin e paligjshëm të atyre që konsideroheshin si kundërshtarë.
“Ndër këta kundërshtarë përfshiheshin persona që ishin, ose që konsideroheshin se kishin qenë: (a) bashkëpunëtorë ose të lidhur me forca, zyrtarë ose institucione shtetërore të RFJ-së, ose që (b) ndryshe nuk mbështetnin qëllimet ose metodat e UÇK-së dhe më vonë të QPK-së, ndër të cilët persona të lidhur me LDK-në dhe serbë, romë dhe persona të kombësive të tjera (bashkërisht, ‘kundërshtarët’). Ky qëllim i përbashkët përfshinte krimet e përndjekjes, burgosjes, arrestimit dhe ndalimit arbitrar ose të paligjshëm, akte të tjera çnjerëzore, trajtimin mizor, torturën, vrasjen dhe zhdukjen me forcë të personave”, thuhet në aktakuzë.
Tutje, në aktakuzë përmenden edhe Azem Syla, Lahi Brahimaj, Fatmir Limaj, Sylejman Selimi, Rrustem Mustafa, Shukri Buja, Latif Gashi dhe Sabit Geci.
Sipas aktakuzës, të akuzuarit bashkë me udhëheqësit tjerë të UÇK-së kontribuuan në arritjen e qëllimit t përbashkët.
“Si alternativë, disa ose të gjithë këta individë nuk ishin anëtarë të ndërmarrjes kriminale të përbashkët, por u përdorën nga anëtarë të ndërmarrjes kriminale të përbashkët për të kryer krime për realizimin e qëllimit të përbashkët (së bashku me anëtarët e NKP-së, bashkërisht ‘anëtarët dhe instrumentet e NKP-së’)”, thotë akti akuzues.
