Abdixhiku s’pranoi të shkonte në Kuvend për Begajn, por Gjukanoviqit i kishte shkuar në hotel

Aktuale

Abdixhiku s’pranoi të shkonte në Kuvend për Begajn, por Gjukanoviqit i kishte shkuar në hotel

Më: 16 gusht 2022 Në ora: 12:51
Abdizhiku dhe Gjukanoviq, 19 maj, 2022

LDK-ja është indinjuar që presidenti i Shqipërisë, Bajram Begaj nuk shkoi në zyrat e kësaj partie për ta takuar Lumir Abdixhikun. Ky i fundit para 3 muajsh s’e pati problem të dalë jashtë zyrave të partisë për ta takuar presidentin e Malit të Zi, Milo Gjukanoviq.

Presidenti i Shqipërisë, Bajram Begaj po e zhvillon vizitën e parë zyrtare në Kosovë. Ai në Prishtinë u takua me krerët e institucioneve dhe liderët e partive politike opozitare, me përjashtim të kreut të Lidhjes Demokratike të Kosovës, Lumir Abdixhikut.

Begaj i takoi krerët e opozitës veç e veç në Kuvendin e Kosovës. Nga LDK thënë jozyrtarisht se presidenti shqiptar ka kërkuar të takohen në ambiente të tjera, gjë të cilën s’e ka pranuar partia më e vjetër në vend.

Por para 3 muajsh, në maj, Abdixhiku kishte shkuar në një hotel në Prishtinë për ta takuar presidentin e Malit të Zi, Millo Gjukanoviq. Atëherë ai nuk qëndroi në zyrat e partisë duke pritur që aty t’i shkonte presidenti malazez.

“Sot, me bashkëpunëtorë, takuam Presidentin e Malit të Zi, Milo Gjukanoviq. Biseduam për të ardhmen e dy shteteve tona dhe perspektivën euro-atlantike që Kosova dhe Mali i zi si shtete fqinje kanë”, thoshte Abdixhiku, duke e vlerësuar Malin e Zi si partner të rëndësishëm rajonal për Kosovën.

Për mostakimin me Begajn, në LDK thanë se iu vjen keq dhe se “nuk e kuptojmë refuzimin” e presidentit shqiptar për të shkuar në zyrat e partisë, duke e shprehur habinë “për një qasje të pazakontë”.

LDK-ja u indinjua që Begaj nuk veproi si presidentët e kryeministrat paraprakë të Shqipërisë, të cilët gjatë vizitave në Kosovë, liderëve opozitarë u shkonin për takime nëpër parti.

Të nderuar lexues të gazetës “Bota sot”, komentet që përmbajnë fyerje, ofendime dhe sharje nuk lejohen në portal. Andaj, komentet e juaja do të kalojnë në filtra për aprovim dhe të tillat që përmbajnë gjuhë që nuk përkon me rregullat, nuk do të aprovohen. Ju faleminderit.
Sot mund të lexoni Shfletoni kopertinat