Nga Thaçi te Haradinaj dhe burimet e KFOR-it, krejt çka tha James Covey në ditën e fundit të dëshmisë në Hagë

Në Dhomat e Specializuara të Kosovës në Hagë ka përfunduar dëshmia e Jock Covey, i cili ka shërbyer në Kosovë si zëvendës i përfaqësuesit special të sekretarit të OKB-së, Bernard Kushner. 

Në fund të dëshmisë së tij, ai kërkoi të bëjë një koment por kjo nuk iu lejua nga kryetari i trupit gjykues, Charles Smith.

Covey: A mund të bëj një koment të fundit?

Smith: Nuk mund të bësh, sepse nuk mund ndjekim atë me pyetje pasuese. Kemi përfunduar. Faleminderit që ishit.

Covey: Faleminderit për mundësinë që më dhatë për të ofruar dëshminë.

Dëshmitari James Covey ka deklaruar se Hashim Thaçi nuk ishte një person i dhunshëm dhe as nuk kishte predispozita të tilla. Përkundrazi, ai tha se Thaçi iu trembej komandantëve të UÇK-së që ishin famëkeq për dhunë.

Por, kur u pyet nga gjyqtari Christoph Barthe, Covey tha se ishte e qartë edhe në Rambuje se Thaçi trembej nga komandantët e zonave, ku edhe ishte kërcënuar drejtpërdrejt, raporton “Betimi për Drejtësi“.

“Që trembej është e qartë edhe në Rambuje që ai është kërcënuar drejtpërsëdrejti që nëse ai nuk pajtohej me kërkesat e komandantëve të zonave. Por, ishte edhe sjellja e tij e qartë. Mënyra se si ishte i kujdesshëm sa i takon marrëdhënieve me udhëheqjen e lëvizjes së UÇK-së. Siç e thash edhe më herët në profesionin tonë ne nuk kemi qasje asnjëherë në informacione të plota. Ne, thjesht nxjerrim përfundime nga çka kemi parë, çka kemi dëgjuar dhe bazuar në përvojën tonë jetësore”, tha ai.

Dëshmitari Covey e mohoi se Thaçi ia kishte thënë ndonjëherë se kishte frikë.

“Jo, jo! Absolutisht, nuk e lejon krenaria ta thotë një diçka e tillë. Kjo është e kuptueshme, ne e ndjemë vetë, e pamë vetë një gjë të tillë”, tha ai.

Përveç kësaj, në sallën e gjyqit u diskutua edhe për vrasjen e 14 bujqve serbë në Grackë të Lipjanit

Dëshmitari ka thënë se Hashim Thaçi në mënyrë të hapur dhe të përsëritur i ka dënuar vrasjet në Grackë, por as ai e as ndonjë anëtar i KTK-së nuk ishte i gatshëm për ta nënshkruar një deklaratë për ta dënuar këtë ngjarje.

“Jo, ende nuk e kuptoj. Më duket që disa prej këtyre zhvillimeve nuk kanë ardhur në rendin e duhur kronologjik”, tha dëshmitari.

Covey mohoi që dikush i ka treguar se pse nuk u nënshkrua kjo deklaratë, duke përfshirë edhe Thaçin. Tha se nuk ka dijeni nëse ky i fundit e ka marrë ndonjë hap për të kuptuar se kush ka qenë përgjegjës për vrasjen e këtyre serbëve.

Dëshmitari James Peter Covey deklaroi në Hagë se kur thotë udhëheqës të lëvizjes së UÇK-së, e ka fjalën për komandantët e zonave të UÇK-së.

“Më këtë formulim, unë e kam fjalën për udhëheqësit e UÇK-së në terren– për komandantët e zonave në terren”, tha dëshmitari, raporton “Betimi për Drejtësi“.

Duke u përgjigjur në pyetjet e gjyqtarit Fergal Gaynor, Covey tha se këtë term e ka për komandantët e zonave dhe për askënd tjetër. Ndërsa, për termin “udhëheqës i UÇK-së”- që përdorej për Thaçin, Covey tha se ishte një titull që nuk kishte asnjë bazë.

“Ky ishte titulli që mbante ai. Titull që dukej se ishte një pretendim pa asnjë bazë”, tha dëshmitari kur u pyet se a e kanë trajtuar Thaçin si udhëheqës të UÇK-së.

Covey theksoi se ata kanë arritur në përfundimin se pretendimi që Thaçi është udhëheqës i UÇK-së, është pretendim bosh.

“Ne, kemi arritur në përfundimin se bëhej fjalë për një pretendim bosh”, tha Covey.

Gjithashtu, dëshmitari u pyet se a ka pasur qasje në ndonjë prej komunikatave që pretendohet se janë lëshuar nga UÇK-ja.

“Nuk besoj që në atë fazë të hershme kemi pasur atë informacion. Nuk besoj, nuk besoj”, tha Covey.

Ai tha se ka dëgjuar për persona që bënin ndalime dhe arrestonin njerëz gjatë periudhë së verës së 1999-ës.

Gjatë dëshmisë, dëshmitarit iu prezantua një dokument që pretendohet se është lëshuar nga Qeveria e Përkohshme më 15 korrik 1999, konkretisht nga Ministria e Financave lidhur me taksën e akcizës dhe shifrën e qarkullimit, sipas asaj që tha gjyqtari.

“Nuk besoj ta kem parë më parë”, u përgjigj dëshmitari.

Ai u pyet se a e kishte Qeveria e Përkohshme autoritetin që të mbledhte taksa dhe të miratonte masa ndëshkimore lidhur me mospërmbushjen e këtyre obligimeve.

“Jo. Nga mënyra se si e kemi kuptuar ne mandatin… asnjë prej këtyre nuk do të kishte patur vlerë ligjore”, u shpreh Covey.

Dëshmitari mohoi të ketë dijeni se kush ka qenë ministër i Rendit Publik në Qeverinë e Përkoshme. Po ashtu, mohoi se Ministria e Rendit Publik e Qeverisë së Përkohshme, sipas rezolutës 1244, kishte autoritetin të thirrte dhe të ndalonte një person të caktuar.

Covey gjithashtu tha se ka dëgjuar për ndalim, por s’ka pasur raporte për ndalime që i atribuoheshin kësaj ministrie, autoritetin e së cilës nuk e pranonin njashtu edhe të Qeverisë së Përkohshme të Kosovës.

Me kaq përfunduan pyetjet e trupit gjykues për këtë dëshmitar. Pyetje shtesë për dëshmitarin nuk pati Prokuroria.

Ndërsa, me kërkesën e avokatit Luka Mishetiq seanca kaloi në pushim me arsyetimin se për pyetje shtesë nëse ka ose jo i duhej konsultim me klientin e tij, Hashim Thaçin.

Gjatë dëshmisë së tij në Hagë, James Covey tregoi se sipas burimeve nga KFOR-i, kishte dëgjuar se pjesëtarët e mbrojtjes së Ibrahim Rugovës ishin vrarë dhe se për këtë sulm përgjegjës ishte Daut Haradinaj.

“Nga bisedat me Bernard Kouchner dhe nga ajo që kemi mësuar nga burimet e KFOR-it më vonë, ne e kuptuam që të gjithë truprojat e tij ishin vrarë pothuajse të gjithë. Nuk e di nëse kjo është fushë për të cilën mund të flas unë në mënyrën e duhur pasi unë nuk jam informuar në mënyrë të drejtpërdrejtë. KFOR-i besonte që vëllai i Ramushit, Daut Haradinajn ishte përgjegjës për këtë sulm”, tha Covey.

Dëshmitari tha se në atë kohë nuk kanë pasur dijeni për këtë dhe kanë mësuar shumë më vonë, raporton “Betimi për Drejtësi“.

Covey tha se e di që Daut Haradinaj ka qenë pjesë e UÇK-së.

Përpara kësaj, ai ka thënë se LDK-ja ka refuzuar që të marrë pjesë në Komitetin Tranzitor të Kosovës (KTK) dhe që ata kanë menduar se kjo i referohej mungesës së Ibrahim Rugovës.

“Megjithatë, më lejoni të shtoj se në atë moment me datë 16 nuk kishim dijeni se ku ndodhej zoti Rugova vetëm se ai nuk ishte i pranishëm dhe mbase nuk ndodhej fare në Kosovë”, tha dëshmitari.

Ai theksoi se në ditët në vazhdim, LDK-ja dukej pa udhëheqje dhe e ndarë, dukej se nuk arrinte dot konsensus që t’i mundësonte të merrte pjesë në Komitet.

Dëshmitari Covey deklaroi se mendon që LDK-ja ka marrë pjesë në Qeverinë e Përkohshme. Këtë organ e quajti si “të fantazisë” pasi që nuk u funksionalizua me funksione ekzekutive.

Dëshmitari ka treguar se ka pasur tensione në mes LDK-së dhe UÇK-së. Ndërsa, gjyqtari Christoph Barthe e pyeti nëse këto tensione kanë bërë që Rugova të mos kthehej dot në Kosovë.

Covey tha se nuk do të spekulojë, por që vetëm di se anëtarët e LDK-së dukeshin se ishin pa udhëheqje.

“Më kalimin e kohës mësuam përmes Bernard Kouchner që shkoi e takoi. Ai ishte me depresion klinik pavarësisht se unë nuk jam mjek. Kishte frikë për sigurinë e tij personale dhe Bernard më shpjegoi mua që përpjekjet e tij kishin të bënin me bindjen e Rugovës se nëse vendoste të kthehej, siguria e tij do të ishte e siguruar. Kjo ishte një sfidë pasi që KFOR-i nuk mundej që të siguronte mbrojtjen e tij personale, por mund të siguronte zonën përreth tij”, tha ai.

Covey tha se Rugova u kthye pas këtyre sigurive pavarësisht nëse e ka kuptuar këtë në këtë mënyrë ose jo.

Më pas, dëshmitari u pyet se nga çfarë kishte frikë Ibrahim Rugova, dhe kjo duke u bazuar nga biseda me Kouchner. Si rrjedhojë e kësaj, dëshmitari foli për sulmin e pretenduar nga Daut Haradinaj.

Në Hagë po vazhdon seanca ndaj ish-krerëve të UÇK-së, teksa pyetjet për dëshmitarin James Covey i ka filluar trupi gjykues i përfaqësuar nga gjyqtari Christoph Barthe. Sipas deklaratës së dëshmitarit të cilën e lexoi gjyqtari, Covey kishte thënë që sipas mendimit të tij, UÇK-ja ishte një lëvizje tejet e decentralizuar dhe shpesh “pa lidhje në mes krahëve të saj”. Kishte thënë se UÇK-ja përbëhej nga persona kryesisht të fuqishëm dhe autonom, e që shumica ishin të dhunshëm.

Shumica prej këtyre personave, sipas dëshmitarit, kishin pak respekt ose fare për Thaçin, raporton “Betimi për Drejtësi“.

“Kjo është një përshtypje që e kemi marrë nga shumë burime të cilave iu kemi besuar, ose nga raportimet e OSBE-së që kanë qenë të pranishëm gjatë gjithë kohës së konfliktit, nga raportet ditore të KFOR-it dhe është një proces me osmozë i cili rezultoi në këtë përfundim me të cilin ramë dakord të gjithë”, tha Covey.

Kur u pyet se kush ishin këta persona të fuqishëm që e drejtonin UÇK-në, dëshmitari tha se ndër ta ishin Sami Lushtaku dhe Ramush Haradinaj.

“Kemi përmendur deri tani zotin Lushtaku, Ramush Haradinaj, ishte një tjetër. Këtu kemi të bëjmë me dy personalitete radikale të ndryshme. Ka patur edhe të tjerë por nuk më kujtohen të gjitha karakteret e kësaj lëvizje”, tha Covey.

Dëshmitari tha se hamendëson që vetëm një herë e ka takuar Thaçin në pranin të komandantëve të zonave.

Në dëshminë e tij që u lexua nga gjyqtari, dëshmitari kishte thënë se Thaçi ka luajtur një rol konstruktiv dhe ka ndihmuar që t’i çojnë më tej synimin e paqeruajtësve duke e ndarë mendjen, pushtetin dhe meritat me personat që kishte denoncuar më parë.

“Kryesisht bëhet fjalë për zotin Rugova të cilin më parë zoti Thaçi e kishte sharë në mënyrë dramatike dhe në fillim dukej se kishte armiqësi të konsiderueshme ndaj tij. Me kalimin e kohës dhe në kuadrin e zhvillimeve ai e ndryshoi këtë sjellje në mënyrë thelbësore brenda disa muajve. Filloi të ndante pushtetin më atë, vendin më atë dhe këtu bëhej fjalë për politikan. Si të thuash ndarja e vëmendjes është e vështirë për një politikan. Pra, ai po ndante pushtetin dhe vëmendjen me atë person të cilin e kishte sharë më parë. Nuk kam dijeni që ai të ketë patur të njëjtën armiqësi ndaj zotit Qosja por unë kryesisht e kisha ndërmend zotin Rugova”, u shpreh ai.

Diplomati James Peter Covey gjatë dëshmisë së tij në Hagë, të enjten mohoi se ka parë ndonjë gjë që do ta bënte të besojë ose mendojë që Hashim Thaçi po përpiqej që të merrte pushtetin në Kosovë përmes apo duke kryer krime kundër kundërshtarëve të tij, qoftë personalisht ose me anë të pjesëtarëve të tjerë të UÇK-së që kryenin këto krime në interes të tij.

Covey tha se shumë shpejt kanë arritur në vlerësimet se ai nuk kishte autoritet të tillë personal, raporton “Betimi për Drejtësi“.

“Jo, dhe mendoj që shumë shpejt kemi arritë në vlerësime se ai nuk e kishte autoritetin personal për të bërë që dikush tjetër të bënte një gjë të tillë. Për më tepër, unë dhe ne arritëm në këtë përfundim se ai dinte se nuk e kishte këtë pushtet dhe këtë fuqi”, tha Covey.

Për Thaçin, Covey tha se e krijoi karrierën hap pas hapi, si dhe duke punuar me UNMIK-un dhe institucionet ndërkombëtare.

“Pra, ai filloi këtë karrierë duke zbuluar hap pas hapi se çfarë mund të bënte për ta krijuar rrugëtimin e tij politik. Ai ishte në të njëjtën kohë, nuk na përket neve nëse ai dëshironte me gjithë mend më të mirën për Kosovën, apo se si mund të realizoheshin ambiciet e tij në mënyrën më të mirë. Ai e gjeti vetë mënyrën për ta bërë këtë dhe ishte detyra jonë që ta ndihmonim ne në këtë rrugëtim. Pra, duke punuar me UNMIK-un, me institucionet. Kjo ka shërbyer edhe interesat e tij. Ky është angazhimi më i mirë që kërkohet nga një politikan”, tha ai.

Dëshmitari shtoi se këto veprime po i shërbenin edhe interesave të tij personale. Tha se ky nuk ishte vlerësim duke qenë naiv, por ishte vlerësim i qartë.

Me kaq përfundoi pyetjet avokati Luka Mishetiq për këtë dëshmitar dhe seanca kaloi në pushim për 10 minuta.

Dëshmitari James Covey mohoi para Gjykatës në Hagë se i konsideron Agim Çekun dhe Hashim Thaçin si ekstremistë të UÇK-së.

Veç kësaj, duke u përgjigjur në pyetjet e avokatit të Thaçit, Luka Mishetiq, dëshmitari tha se këta dy persona i konsideron të kundërtën e ekstremizmit, raporton “Betimi për Drejtësi“.

“Në fakt, jo. Në fakt është krejt e kundërta”, tha dëshmitari Covey.

Ndryshe, dëshmitari kishte pohuar edhe gjatë ditës së djeshme se në librin e tij kishte thënë se ekstremistët e UÇK-së përdornin dhunë dhe terror për të dëbuar serbët jashtë Kosovës.

Në anën tjetër, duke folur për partitë që u krijuan pas luftës, dëshmitari Covey tha se është në dijeni lidhur me ato.

Por, mohoi se gjatë këtyre ditëve të ketë parë ndonjë urdhër të lëshuar nga Thaçi në UÇK. Përveç kësaj, ai po ashtu mohoi se ka parë ndonjë raport që dikush ia ka drejtuar tani të akuzuarit gjatë periudhës së luftës.

Jock Covey gjithashtu mohoi të ketë parë ndonjë gjë që mund ta bëjë që të dyshonte se Thaçi mund të ishte në gjendje që të ndalonte ose parandalonte krimet që dyshohet se janë kryer nga pjesëtarët apo ish-pjesëtarët e UÇK-së.

Në këtë seancë, në një pjesë të saj nuk kishte fare përkthim në gjykatë.

-----

Dëshmitari i katërt i Mbrojtjes së Thaçit, James (Jock) Covey, vazhdon edhe sot dëshminë e tij në Speciale.

Dëshmitari James Peter Covey, në dëshminë e tij në Hagë, ka thënë se Hashim Thaçi nuk ka ndërlidhje me asnjë nga pretendimet e prokurorisë për veprimtari kriminale nga ana e Ushtrisë Çlirimtare të Kosovës.

Dëshmia e tij vazhdon me pyetjet shtesë të avokatit Luka Mishetiq.

James (Jock) Covey është dëshmitari i thirrur nga Mbrojtja e Hashim Thaçit, sipas përmbledhjes së Mbrojtjes të lexuar në gjykatë, Covey ka shërbyer si Zëvendës Kryesor i Përfaqësuesit Special të Sekretarit të Përgjithshëm të OKB-së për Kosovën gjatë periudhës përkatëse.