Partia Demokratike e Ashkalive të Kosovës (PDAK) po e mbështet marshin qytetar “Drejtësi, jo politikë ”, i cili do të mbahet më 17 shkurt, në Prishtinë, në mbrojtje të drejtësisë së paanshme dhe të vlerave të luftës çlirimtare.
PDAK ka ftuar të gjithë anëtarët, simpatizantët dhe qytetarët e Kosovës që besojnë në shtetin e së drejtës të bashkohen në këtë marsh.
Sipas tyre, pjesëmarrja është mesazh i qartë se demokracia dhe drejtësia e vërtetë mbrohen me zë të lirë dhe qytetarë.
“Në Ditën e Pavarësisë së Republikës së Kosovës, ky marsh përfaqëson zërin e qytetarëve që kërkojnë një drejtësi të pavarur, të paanshme dhe të çliruar nga çdo ndikim politik. Drejtësia nuk duhet të jetë mjet presioni apo pazari politik, por shtyllë e barazisë dhe sigurisë juridike për të gjithë qytetarët, pa dallim”, thuhet në njoftim.
Marshi “Drejtësi, jo politikë ”, do të mbahet më 17 shkurt, në ora 14:00, në Sheshin “Skënderbeu” në Prishtinë.