Një studim i përbashkët nga Organizata Botërore e Shëndetësisë (OBSH) dhe Kina mbi origjinën e COVID-19 thotë se transmetimi i virusit nga lakuriqët e natës te njerëzit përmes një kafshe tjetër është skenari më i mundshëm dhe se rrjedhja nga laboratori është pak e besueshme, transmeton AP duke iu referuar një draft-raporti në të cilin kishte qasje.
Agjencia deklaron se sot ajo mori versionin pothuajse përfundimtar të raportit të OBSH-së nga një diplomat me qendër në Gjenevë, i cili nuk dëshironte të identifikohej sepse nuk ishte i autorizuar të jepte informacion para botimit zyrtar të tij.
Nuk dihet ende nëse raporti mund të ndryshohet para se të botohet, por gjetjet që përmban kryesisht ishin të pritshme dhe lanë shumë pyetje pa përgjigje, raporton AP.
Ekipi i OBSH-së sugjeroi kërkime të mëtejshme në të gjitha drejtimet e mundshme në lidhje me origjinën e virusit korona, përveç hipotezës që ai "shpëtoi" nga laboratori.
Studiuesit morën parasysh katër skenarë sipas radhës së probabilitetit. Ata arritën në përfundimin se transmetimi përmes një kafshe tjetër është shumë i mundshëm. Ata vlerësuan se përhapja e drejtpërdrejtë nga lakuriqët e natës te njerëzit është e mundshme, dhe ata gjithashtu thanë se përhapja me produkte ushqimore "me zinxhir të ftohtë" është e mundur.
Publikimi i raportit është vonuar disa herë, dhe një zyrtar i OBSH-së tha në fund të javës së kaluar se ai pret që të jetë gati për publikim në ditët e ardhshme.
Raporti bazohet kryesisht në vizitën e një ekipi ekspertësh ndërkombëtarë të OBSH-së në qytetin kinez Wuhan, ku u zbulua për herë të parë COVID-19, gjatë janarit dhe shkurtit të vitit të kaluar, thekson AP.
