Guatemala në alarm, policë të vrarë dhe shkolla të pezulluara pas dhunës së bandave

Bota

Guatemala në alarm, policë të vrarë dhe shkolla të pezulluara pas dhunës së bandave

Më: 18 janar 2026 Në ora: 21:35
Foto ilustrim

Dhuna shpërtheu mëngjesin e të dielës në Guatemala pasi forcat e sigurisë rikthyen kontrollin e një burgu dhe arrestuan udhëheqësin kryesor të bandës famëkeqe Barrio 18, Aldo Duppie, i njohur si “El Lobo”.

Reuters shkruan se autoritetet morën nën kontroll burgun Renovacion 1 pranë qytetit Escuintla, ku të burgosurit kishin bërë revoltë dhe kishin marrë pengje, duke kërkuar privilegje për udhëheqësin e tyre. Pamjet e policisë civile treguan El Lobon me shpatull të gjakosur, teksa shoqërohej jashtë burgut.

Pak më vonë, shpërthyen sulme të njëkohshme kundër policëve në kryeqytetin e Guatemalës dhe zonat përreth.

Të paktën shtatë oficerë policie janë vrarë në sulme të ndryshme, si dhe një anëtar bande, tha ministri i Brendshëm Marco Antonio Villeda të dielën. Dhjetë policë janë plagosur.

Ministri tha se qeveria nuk do të negociojë me bandat.
“Unë nuk po bëj pakte me bandat. Jam plotësisht i përkushtuar të mbroj sundimin e ligjit,” tha ai.
“Ne kemi folur me Presidentin Bernardo Arévalo, dhe operacione të përbashkëta me ushtrinë do të nisen për të siguruar qendrat urbane dhe për të garantuar sigurinë publike,” shtoi Villeda.

Në një intervistë për radion lokale, drejtori i Policisë Kombëtare Civile, David Boteo, nuk e përjashtoi mundësinë që anëtarët e bandave të sulmojnë civilët dhe u këshilloi qytetarëve të qëndrojnë në shtëpi.

Ministrja e Arsimit të Guatemalës anuloi mësimet në shkolla në gjithë vendin të hënën, ndërsa autoritetet e kryeqytetit anuluan aktivitetet rekreative dhe kulturore të planifikuara për të dielën.

“Në përgjigje të rekomandimeve të ekspertëve të sigurisë, kam vendosur të pezulloj mësimin në shkallë kombëtare nesër. Në këtë moment, gjëja më e rëndësishme është siguria e nxënësve dhe mësuesve,” tha ministrja e Arsimit, Anabella Giracca.

Lirimi i pengjeve në burg lë ende 37 pengje të mbajtura në dy burgje të tjera.

Kongresi i Guatemalës shpalli Barrio 18 grup terrorist në tetor 2025, pak pas administratës së Presidentit amerikan Donald Trump që e klasifikoi bandën si organizatë terroriste të huaj.

Udhëheqësi i saj, El Lobo, aktualisht po vuan dënime me burg që arrijnë gjithsej rreth 2 mijë vite. Ai është i martuar me mbesën e Sandra Torres, ish-zonjës së parë të Guatemalës, e cila ka qenë kandidate për president në tre zgjedhje, duke përfunduar së fundmi e dyta pas presidentit aktual Arévalo në vitin 2023.

comment Për komente lëvizni më poshtë
Sot mund të lexoni Shfletoni kopertinat