Çmimi i naftës është rritur mbi 100 dollarë për fuqi (barron) për herë të parë që nga korriku, ndërsa përshkallëzimi i konfliktit në Lindjen e Mesme kërcënon të shkaktojë ndërprerje të mëtejshme të furnizimeve globale.
Nafta Brent u rrit me më shumë se 3% pas përplasjes së fundit mes SHBA-së dhe Iranit në Gjirin Persik dhe sulmeve të Houthive ndaj qyteteve saudite, raporton The Guardian e përcjell KosovaPress.
Ushtria amerikane tha se kishte shkatërruar disa cisterna iraniane, pasi Teherani u përpoq të godiste një anije luftarake të marinës amerikane me raketa balistike. Një natë më parë, Houthit e mbështetur nga Irani sulmuan katër qytete në Arabinë Saudite, duke plagosur më shumë se 70 persona dhe duke shkaktuar zjarre në disa instalacione nafte.
Çmimi i naftës është rritur me një të katërtën që nga fillimi i gushtit, ndërsa shpresat për një zgjidhje të përhershme të luftës gjashtëmujore janë zbehur. Çmimet janë luhatur gjatë gjashtë muajve të fundit që nga fillimi i bllokadës së ngushticës së Hormuzit nga Teherani, e cila shkaktoi frikën se bota mund të përballej me ndërprerjen më të madhe të furnizimeve energjetike në histori.
Në javët e para pas sulmeve të para amerikano-izraelite ndaj Iranit në fund të shkurtit, çmimet e naftës u rritën mbi 100 dollarë për fuçi. Çmimi i naftës arriti kulmin në 126 dollarë në prill, por më pas ra për shkak të shpresave për një armëpushim.
Më pas, çmimi filloi të rritej përsëri pasi memorandumi i mirëkuptimit mes SHBA-së dhe Iranit dështoi dhe armiqësitë rifilluan.
Rritja e çmimeve të energjisë ka shtuar frikën për inflacionin dhe mundësinë e normave më të larta të interesit këtë vit. Në SHBA, ekonomistët presin të paktën një rritje të normës së interesit nga Rezerva Federale deri në fund të vitit.
