Nëntë persona kanë përfunduar në Spitalin e Përgjithshëm të Pejës pas një aksidenti trafiku që ka ndodhur mbrëmjen e djeshme, rreth orës 23:00.
Sipas njoftimit të spitalit, të gjithë të lënduarit janë pranuar menjëherë për trajtim mjekësor nga ekipet emergjente. Pas ekzaminimeve dhe ndërhyrjeve të nevojshme, është bërë e ditur se:
Dy pacientë janë transferuar në Qendrën Klinike Universitare të Kosovës (QKUK), njëri prej tyre në gjendje të rëndë shëndetësore;
Dy pacientë të tjerë po trajtohen në Spitalin e Përgjithshëm në Pejë;
Ndërsa pesë persona, pas trajtimit, janë liruar për në shtëpi.
Nga Spitali i Pejës është bërë e ditur se ekipet mjekësore kanë reaguar me shpejtësi, duke ofruar ndihmën e parë dhe trajtimin e duhur për të gjithë të lënduarit.
Rrethanat e aksidentit nuk janë bërë të ditura ende, ndërsa autoritetet përkatëse pritet të publikojnë më shumë informacione pas përfundimit të hetimeve.
