Marrëdhënia dikur e ngushtë mes Dukeshës së Sussex, Meghan Markle, dhe ish-redaktorit të British Vogue, Edward Enninful, është prishur pas një mosmarrëveshjeje rreth një projekti të planifikuar për revistën.
Sipas The Mail on Sunday, përplasja ndodhi në vitin 2022 kur Vogue kishte planifikuar një mbulim të gjerë për Meghan dhe Princin Harry, i lidhur me pjesëmarrjen e saj në Samitin One Young World në Mançester.
Meghan priste të ishte në kopertinën e shtypur ose të paktën në atë dixhitale, por Enninful tashmë kishte një tjetër kopertinë të rezervuar dhe refuzoi kërkesën, shkruan DailyMail.
Burime nga Conde Nast thanë se Enninful i ofroi Meghan vetëm një artikull të madh brenda revistës dhe në versionin online, por ajo nuk e pranoi. Si pasojë, projekti u anulua dhe marrëdhënia e tyre nuk u rikuperua kurrë.
Që nga ajo kohë, Enninful është afruar më shumë me Familjen Mbretërore – një fakt që burimet sugjerojnë se nuk i ka pëlqyer Meghanit.
Ai ka marrë pjesë në kurorëzimin e Mbretit Charles dhe është përfshirë në disa nga organizatat e tij bamirëse.
Në kontrast me këtë distancim, kujtohet bashkëpunimi i tyre i suksesshëm në vitin 2019, kur Meghan ishte redaktore e ftuar për një numër të Vogue që u shit plotësisht për më pak se dhjetë ditë.
Enninful dikur e mbrojti publikisht Meghanin, duke e quajtur një “grua të guximshme”, por nuk dihet nëse ai do të bënte të njëjtën gjë sot.
As Meghan dhe as Enninful nuk kanë komentuar zyrtarisht mbi ndarjen e tyre, ndërsa Conde Nast ka refuzuar të japë deklarata.
