Martesa e Justin dhe Hailey Bieber është në qendër të komenteve, pasi një postim i këngëtarit disa orë më parë është arsyeja kryesore.
Hailey Bieber u fotografua për herë të parë për kopertinën e “Vogue” dhe ylli i popit, në vend që ta uronte, e gjeti mundësinë për të ndarë një histori personale me fansat e tij.
Justin Bieber postoi kopertinën në Instagram dhe në mbishkrimin që shoqëronte postimin e tij, ai zbuloi një sherr që pati me gruan e tij, në të cilin i kishte thënë asaj me inat se “nuk do të fotografohet kurrë për kopertinën e Vogue”. Siç e pranon ai tani, deklarata e tij ishte e padrejtë dhe e pasaktë.
“E di, ishte shumë keq “, shkroi artisti fitues i çmimit Grammy, duke vënë në dukje se u ndje “i lënduar” në momentin që shqiptoi fyerjen. “Zemër, ti e di tashmë, por më fal që të thashë se nuk do të dilje kurrë në kopertinën e Vogue, sepse padyshim që gabohesha”, vazhdoi ai me keqardhje.
Megjithatë, disa orë më vonë, Justin Bieber e modifikoi mbishkrimin, duke e zëvendësuar tërësisht me një sërë emojish. Ky ndryshim nuk kaloi pa u vënë re nga ndjekësit e tij, të cilët nxituan të komentonin lëvizjen e tij negativisht.
Ylli i popit dha një tjetër tregues se postimi kontrovers shkaktoi tension duke postuar një foto të një krijese deti rozë po atë ditë, duke shkruar në mbishkrim: “Në ditë të vështira, këto krijesa të vogla dhe të rralla më sjellin pak gëzim”.
Kohët e fundit, kanë qarkulluar thashetheme të ndryshme rreth martesës së Justin dhe Hailey Bieber, ku shumica raportojnë se marrëdhënia e çiftit po shkatërrohet. Në intervistën e saj të fundit për Vogue, Hailey Bieber u përpoq të shpërndante thashethemet e ndarjes që qarkullonin prej muajsh.
