Johnny Depp dhe Penelope Cruz janë ribashkuar në Madrid për xhirimet e filmit të tyre të katërt të përbashkët, Day Drinker.
Dyshja vizitoi Muzeun Reina Sofia, ku bënë një selfie të buzëqeshur që u postua në Instagram nga muzeu dhe Depp, së bashku me mesazhin: “Faleminderit që na u bashkuat… deri herën tjetër!”
Depp dhe Cruz kanë punuar më parë së bashku në filmat “Blow” (2001), “Pirates of the Caribbean: On Stranger Tides” (2011) dhe “Murder on the Orient Express” (2017), shkruan DailyMail.
Filmi i ri, i drejtuar nga Marc Webb, ndjek një të huaj misterioz (Depp) dhe një bariste të pikëlluar, që përfshihen në një rrjet ngjarjesh të papritura dhe përballen me një figurë kriminale, e luajtur nga Cruz.
“Day Drinker” shënon rikthimin e Depp në një produksion të madh që nga filmi “Fantastic Beasts” (2018), pas pushimit të tij nga Hollywood-i pas gjyqit të profilit të lartë me Amber Heard.
Ndërkohë, Cruz e ka mbështetur publikisht mikun e saj dhe e ka cilësuar si një njeri të jashtëzakonshëm me një zemër të madhe.
