Sali Berisha në turin e tij “Foltorja” tha se është pranuar padia e tij nga gjykata franceze, por njëkohësisht është caktuar edhe data e Kuvendit të jashtëzakonshëm Kombëtar të PD me firmat e bazës.
Analisti Ilir Demalia tha se e gjithë kjo situatë është qesharake në të gjitha drejtimet.
“Kjo është qesharake në të gjitha drejtimet dhe e kuptoj pse Berisha e bën këtë se ka qenë në funksionet më të larta të shtetit, President dhe Kryeministër. Problemi është që Berisha e di mirë që nuk ka sens, jo për një jurist por edhe për një njeri me arsyetim të thjeshtë. Blinken nuk është individ, por përfaqësues i shtetit amerikan. Është zyrtari i dytë më i lartë pas Presidentit në SHBA.
Pra, Blinken nuk ka bërë sulm privat kundër Berishës, por ka shfaqur një vendim që kishte kohë që kishte filluar. Pra këto që kanë suportuar Trump, ky proces ka qenë dhe gjatë administratës Trump sepse sistemi këtu nuk funksionon si në Shqipëri. Në këtë drejtim, mendoj që Berisha e di mirë por mundohet të krijojë tollumbace për brenda në Shqipëri edhe për nderin e vet se është shumë e rëndë në fundin e karrierës së tij të marrë këtë goditje. Kë do marrë gjykata në Francë? Çfarë autoriteti ka gjykata franceze të marrë shtetin amerikan? Si do bëhet ky gjyq kur Blinken nuk ka asnjë detyrim paraqitje? Kjo është në të gjitha drejtimet nul. E di shumë mirë Berisha”, tha Demalia për Top Talk.
