Komisioni për Reformën Territoriale nis punën/ PS dhe PD caktojnë ekspertët dhe listën e ‘dëshmitarëve’!

Shqipëria

Komisioni për Reformën Territoriale nis punën/ PS dhe PD caktojnë ekspertët dhe listën e ‘dëshmitarëve’!

Më: 30 qershor 2022 Në ora: 08:46
Foto ilustrim

Komisioni i Reformës Administrativo-Territoriale ka përcaktuar dje listën e gjatë ekspertëve, institucioneve dhe organizatave që do të thirren për të dhënë mendimin për ecurinë e Reformës ekzistuese të bërë 8 vite më parë.

Të parët që do “dëshmojnë” do jenë 12 organizatat e shoqërisë civile javën e ardhshme dhe pas tyre kryetarët aktualë të 7 bashkive, ish-kryetarë, përfaqësues institucionesh shtetërore dhe ekspertë sipas planit të veprimit, që u dakordësua mes palëve. PS-ja caktoi në rolin e eskpertëve teknikë dy ish-kryetarë bashkish, znj. Adelina Farici ish-kryetare e Bashkisë Burrel dhe z. Artan Shkëmbi, ish-kryetar i Bashkisë Pogradec. PD-ja, nga ana e saj përcaktoi dy ekspertët Roland Bejko dhe Agron Haxhimali. 4 ekspertët do të kenë barrën kryesore të dhënies së mendimeve dhe orientimeve për mënyrën se si duhet të organizohet ndarja e re administrativo-territoriale përpara se partitë politike të marrin vendimin e tyre.

7 BASHKI 

Pjesë e grupeve që do të japin mendime për Reformën e re Territoriale do jenë edhe 7 bashki. Kryetarët e këtyre 7 bashkive do të raportojnë përballë anëtarëve të Komisionit të Reformës për efektin e ndarjes administrative të 2014 dhe zbatueshmërinë e saj në shumë dimensione, nga shërbimet deri te buxheti. Bashkëkryetarja e PS-së në Komision, Anila Denaj, tha se janë përzgjedhur bashki të mëdha, mesatare dhe të vogla, në mënyrë që të kuptojmë efektin e reformës në të gjitha dimensionet e saj. “Ne kemi ftuar 6 organizata të shoqërisë civile. Instituti i Politikave Publike dhe Private, Instituti i kërkimeve Urbane. Institucionet që kanë lidhje të drejtpërdrejtë me reformën dhe zbatimin e saj, Ministrinë e Brendshme, Ministrinë Financave dhe Ekonomisë dhe Akademinë e Shkencave.

Gjithashtu, kemi menduar që kjo nuk mund të jetë një tryezë ku nuk dëgjohen bashkitë, ato që janë aktorët kryesorë dhe për këtë arsye kemi ftuar 6 bashki. Bashkia Tiranë, Erion Veliaj; Bashkia Lushnje, Eriselda Sefa; Bashkia Elbasan, Gledian Llatja; Bashkia Kolonjë, Erion Isai; Bashkia Lezhë, Pjerin Ndreu; Bashkia Dimal, Juljana Memaj”, tha Denaj. Për t’i bërë ballë një “armate” të tërë kryebashkiakësh nga mazhoranca, opozita, në mungesë të tyre, ka ndërmarrë një hap për baraspeshim, duke kërkuar një numër të lartë ekspertësh, figurash publike dhe ish-kryetarë bashkish.

Bashkëkryetarja e PD-së në Komision, Dhurata Çupi, bëri të ditur listën e institucioneve pjesë e së cilës është kryetari i Bashkisë së Shkodrës Bardh Spahia, i zgjedhur më 6 mars si kandidat i “Shtëpisë së Lirisë” e ish-Kryeministri Sali Berisha. Po ashtu, pjesë e listës është KLSH-ja, Artan Fuga, Mateo Spaho, Agron Kapllanaj apo Njazi Kosovrasti.

“Nga institucionet propozoj KLSH-në, Departamentin e Auditimit të Performancës dhe Bashkia Shkodër, Bardh Spahia. Organizata ‘CoPlan’, Instituti i Kërkimeve Urbane, Instituti për Demokraci dhe Ndërmjetësim, Qendra për Kërkim dhe Zhvillim Rural. Artan Hoxha, Valbona Karakaçi, Artan Fuga anëtar i Akademisë së Shkencave, Romeo Gurakuqi, Mateo Spaho, dekan i Fakultetit Ekonomik, Universiteti ‘Luarasi’, Ervis Iljazi, Agron Kapllanaj, Tahsim Mema, Njazi Kosovrasti, Ilir Kalemaj”, tha Çupi.

Deputeti i PD-së, Xhelal Mziu, propozoi që pjesë e institucioneve në seanca dëgjimore të jetë edhe INSTAT-i, por kërkoi që të shihen praktikat më të mira në rajon për një reformë gjithëpërfshirëse. Anila Denaj pranoi propozimet, por u shpreh se: “Eksperiencën e vendeve të tjera ta marrim përmes eksperteve, që janë të afte të na sjellin të dhenat. Do na thonë ekspertë për një dëgjesë me INSTAT-in”. Po ashtu, PBDNJ-ja kërkoi që të pyetesh dhe merrej mendim nga Bashkimi Demokratik i Minoritetit Etnik Grek, (Omonia) dhe Vasil Bollano ish-kryetar i Bashkisë Himarë.

EKSPERTËT

Partia Socialiste

Adelina Farrici

Artan Shkëmbi

Partia Demokratike

Agron Haxhimali

Roland Bejko

7 KRYETARËT E BASHKIVE

Partia Socialiste

Bashkia Tiranë, Erion Veliaj

Bashkia Lushnje, Eriselda Sefa

Bashkia Elbasan, Gledian Llatja

Bashkia Kolonjë, Erion Isai

Bashkia Lezhë, Pjerin Ndreu

Bashkia Dimal, Juljana Memaj

Partia Demokratike

Bashkia Shkodër, Bardh Spahia

Të nderuar lexues të gazetës “Bota sot”, komentet që përmbajnë fyerje, ofendime dhe sharje nuk lejohen në portal. Andaj, komentet e juaja do të kalojnë në filtra për aprovim dhe të tillat që përmbajnë gjuhë që nuk përkon me rregullat, nuk do të aprovohen. Ju faleminderit.
Sot mund të lexoni Shfletoni kopertinat