Bjellorusja Darya Daineka, eksperte marketingu, e cila është nuse në Shqipëri, ka rrëfyer se gjuhën shqipe ia ka mësuar vjehrra e saj.
Në emisionin “Good Morning Albanians” në Euronews, Darya ka treguar se me bashkëshortin është njohur kur ajo ka ardhur në Shqipëri në kohën e pandemisë Covid-19.
Ajo tha se pas disa takimeve, ajo vendosi që të vinte dhe të jetonte në Shqipëri. Sipas saj, vendi ynë është shumë i bukur dhe shtoi se do të donte të kishte lindur këtu.
“Erdha në kohën e Coronavirus. Në një lokal u njoha me të dashurin tim. Kur erdha në Bjellorusi folëm shumë në Instagram dhe më pas u takuam në Stamboll. E takova pas tre muajsh. Pastaj dy javë më pas u takuam në Tiranë. Pastaj vendosa që të vij të jetoj në Shqipëri.
Në Bjellorusi unë rri gjithmonë, por nuk ka diçka që është shumë e bukur, ndërsa Shqipëria është e pakrahasueshme për mua, shumë bukur. Unë nuk e di pse nuk kam lindur në Shqipëri. Për mua shqiptarët janë shumë të mirë. Ata më kanë ndihmuar mua shumë. Ata ndihmojnë për mua gjithmonë. Unë e kuptoj që do të mësoj shqip shumë shpejt.
Unë kam dy mësuese që të mësoj shqip, por jo shumë muaj. Unë mësoj vetë ose me mamin e të dashurit, sepse me të dashurin unë flas vetëm anglisht. Ajo nuk di anglisht dhe flasim vetëm shqip, nëse unë nuk di një fjalë, ajo ma shpjegon. Psh kur ajo gaton, tregoi për mua çfarë është lulelakër, ndonjëher ma tregon fjalën në rusisht, sepse di rusisht”, tha Darya.
