Elisa Spiropali, ka reaguar për herë të parë pas emërimit të saj në postin e Ministrit për Europën dhe Punët e Jashtme.
\Ky emërim u konfirmua zyrtarisht nga Kryeministri Edi Rama, duke i besuar asaj një prej pozicioneve më të rëndësishme në qeveri.
Spiropali, e cila më parë ka drejtuar Kuvendin e Shqipërisë, e konsideron këtë detyrë si një nder dhe përgjegjësi të madhe.
Ajo thekson se integrimi i Shqipërisë në Bashkimin Europian brenda vitit 2030 është një mision historik dhe prioritet kryesor i saj.
Në reagimin e saj në Facebook, Spiropali shprehet se prestigji, forca dhe dinjiteti i Shqipërisë dhe shqiptarëve do të jenë përherë detyrë nderi në punën e saj.
Reagimi i plotë i Elisa Spiropalit
“Nder dhe përgjegjësi për mua që pas drejtimit të Kuvendit të Shqipërisë, të marr besimin e Kryeministrit Rama dhe Asamblesë Socialiste për të drejtuar Ministrinë për Europën dhe Punët e Jashtme.
Integrimi i Shqipërisë në familjen tonë natyrale europiane brenda 2030-s nuk është thjesht objektiv politik, por misioni ynë historik.
Prestigji, forca dhe dinjiteti i Shqipërisë dhe i shqiptarëve kudo janë, kanë qenë dhe do të jenë detyra e nderi i jetës sime.
Me besim të palëkundur dhe shumë sfida përpara, ecim së bashku drejt të ardhmes europiane.
Mirënjohje”, shkruan Spiropali.