Sonte nga ora 19:00 deri në orën 22:00 (me orën greke), rruga Kakavijë-Janinë, në kryqëzimin e fshatit Kallpaq, do të jetë sërish e bllokuar për shkak të protestës së fermerëve grekë.
Lajmi është bërë i ditur nga Policia Kufitare Kakavijë, e cila ka marrë informacionin nga policia e shtetit grek, raporton KosovaPress.
Policia Kufitare Kakavijë njofton se për qarkullim do të lejohen vetëm automjetet që do të kenë emergjenca shëndetësore.
Njëherësh, policia kërkon mirëkuptimin e qytetarëve dhe sugjeron planifikimin e udhëtimeve me automjete, në orare të tjera të ditës.
Fermerët grekë gjithashtu dolën në rrugë gjatë fundjavës, duke bllokuar rrugët në disa zona.
Protestat e fermerëve janë të zakonshme në Greqi, por trazirat e fundit shpërthyen për shkak të vonesave në pagesat e subvencioneve pas zbulimeve të kërkesave mashtruese për fondet e BE-së.
Skandali shkaktoi dorëheqjen në qershor të pesë zyrtarëve të lartë qeveritarë dhe mbylljen graduale të një agjencie shtetërore që merrej me subvencionet bujqësore.
