Kukësi e ka nisur fundjavën nën mbizotërimin e mjegullës së dendur, e cila ka qenë e pranishme pothuajse gjatë gjithë javës duke vështirësuar qarkullimin e automjeteve.
Në disa segmente rrugore, mjegulla ka mbuluar plotësisht zonën, duke krijuar kushte të rrezikshme për lëvizjen.
Megjithatë, deri në këto momente nuk janë raportuar aksidente. Autoritetet rrugore u bëjnë thirrje drejtuesve të mjeteve të tregojnë kujdes të shtuar.
Policia rekomandon uljen e shpejtësisë, respektimin e sinjalistikës rrugore dhe përdorimin e dritave të mjegullës, veçanërisht në zonat me terren më të ulët, ku ky fenomen është më i theksuar.
Qëllimi i këtyre masave është shmangia e aksidenteve dhe garantimi i sigurisë në rrugë.
Edhe në shumë zona të Kosovës ka filluar të shfaqet mjegull e dendur, sidomos në vende me lartësi më të ulët, gjë që ul dukshmërinë duke e bërë qarkullimin e mjeteve më të rrezikshme.
