​Me monedha e shufra floriri në “Porsche”, arrestohet 30-vjeçari në Fier

Shqipëria

​Me monedha e shufra floriri në “Porsche”, arrestohet 30-vjeçari në Fier

Më: 17 shtator 2026 Në ora: 13:35
Fotoilustrim

Një 30-vjeçar është arrestuar në Fier pasi në automjetin e tij janë gjetur lingota (pllaka) e monedha floriri dhe para të gatshme.

Policia shqiptare ka bërë të ditur se ai u kap gjatë operacionit të koduar “Gold” që u zhvillua gjatë kontrolleve ndaj automjeteve luksoze.

“Porsche Cayenne”, e drejtuar nga i dyshuari me inicialet A.B., me banim ne Roskovec, ndalua fillimisht për verifikim.

Gjatë kontrollit, policia gjeti 9 monedha dhe 4 lingota (pllaka) floriri. Po ashtu, u sekuestruan 4 mijë euro dhe 93 mijë lekë (rreth 1 mijë e 14 euro).

Sipas njoftimit, 30-vjeçari nuk kishte dokumentacion që dëshmonte origjinën e sendeve me vlerë dhe parave.

Kontrollet vazhduan edhe në banesën e tij, ku u gjet një leje drejtimi e dyshuar si e falsifikuar.

I dyshuari është arrestuar për pastrim të produkteve të veprës penale, transportim të mallrave kontrabandë dhe falsifikim dokumentesh.

Policia ka sekuestruar sendet e gjetura dhe automjetin “Porsche Cayenne” ndërsa ka konfirmuar se materialet i janë dorëzuar Prokurorisë për veprime të mëtejshme. U bë më dije se “pritet edhe nisja e hetimit pasuror për dokumentimin e burimit të arit dhe parave”.

Sot mund të lexoni Shfletoni kopertinat