Protesta ndryshon formë pas katër muajsh, Saraçi: Kërkesa e vetme tashmë është largimi i qeverisë

Shqipëria

Protesta ndryshon formë pas katër muajsh, Saraçi: Kërkesa e vetme tashmë është largimi i qeverisë

Më: 25 tetor 2026 Në ora: 19:24
Pamje nga protesta

Gazetari Romir Saraçi, i ftuar në studion e lajmeve në Ora News, ka komentuar zhvillimet e protestës që prej katër muajsh vijon kundër qeverisë, duke u ndalur te ndryshimi i formës së protestimit dhe te kërkesat e protestuesve.

Sipas Saraçit, protesta nisi fillimisht kundër prishjes së një pjese të territorit për një investim, por shumë shpejt u shndërrua në një lëvizje me kërkesa të drejtpërdrejta politike, përfshirë largimin e qeverisë dhe dorëheqjen e kryeministrit.

Ai e përshkroi fazën e parë të protestës si një tubim paqësor, të karakterizuar nga mesazhe dhe metafora, i cili shpeshherë u paragjykua për shkak të profilit intelektual të pjesëmarrësve. Megjithatë, sipas tij, rikthimi i aktivitetit politik dhe institucional, si dhe nisja e vitit të ri shkollor e universitar, sollën një mobilizim të ri të protestuesve, ku rol të rëndësishëm morën edhe studentët.

Saraçi theksoi se, pas katër muajsh protestash paqësore, studentët kanë kaluar në forma më të drejtpërdrejta të reagimit, me synimin për të tërhequr vëmendjen e qeverisë dhe për të imponuar shqyrtimin e kërkesave të tyre.

Sipas gazetarit, në 13 ditët e fundit protesta duket se ka marrë një drejtim më të qartë politik, duke e vendosur në qendër të saj kërkesën për dorëheqjen e kryeministrit dhe largimin e qeverisë.

Ai përmendi gjithashtu akuzat e ngritura nga protestuesit për korrupsion, afera korruptive, pengim të drejtësisë, përdorim të forcës së pushtetit dhe përqendrim të pushteteve. Sipas Saraçit, protestuesit e shohin largimin e qeverisë si zgjidhjen e vetme për situatën që kundërshtojnë.

Sot mund të lexoni Shfletoni kopertinat