Reagon Bahtiri pasi një e mitur në Mitrovicë u dhunua nga dy persona

Aktuale

Reagon Bahtiri pasi një e mitur në Mitrovicë u dhunua nga dy persona

Më: 20 maj 2021 Në ora: 23:08
Agim Bahtiri

Kryetari i Mitrovicës, Agim Bahtiri ka reaguar pasi u raportua se një e mitur u dhunua nga dy persona në një fshat të Mitrovicës.

Bahtiri përmes një postimi në Facebook ka ftuar organet e hetuesisë që të kryejnë punën e tyre dhe të dyshuarit të marrin dënimin e merituar.

“E dënoj ashpër rastin e dhunimit të vajzës së mitur, që ka ndodh para dy ditësh në një fshat të Mitrovicës. Ftoj organet e hetuesisë që ta kryejnë punën e tyre me efikasitet, ku kryerësit të këtij akti të tmerrshëm duhet të marrin dënimin e merituar sa më shpejt që është e mundshme”, ka shkruar Bahtiri.

Një e mitur në Mitrovicë dyshohet se është dhunuar nga dy persona.

Rastin e ka konfirmuar Policia e Rajonit të Mitrovicës, ku ka njoftuar se dy të dyshuarit për këtë rast tashmë janë arrestuar.

Të dyshuarve u është caktuar masa e ndalimit policor, derisa viktima është dërguar në Institutin e Mjekësisë Ligjore për ekzaminim mjekësor.

“Me vendim të prokurorit viktima e këtij rasti është dërguar në Institutin e Mjekësisë Ligjore për ekzaminim mjekësor, ndërsa pas intervistimit të të dyshuarve, ndaj tyre është caktuar masa e ndalimit policor. Hetuesit policorë në bashkëpunim me prokurorin për të mitur do t`i vazhdojnë hetimet për zbardhjen e plotë të të gjitha rrethanave që kanë të bëjnë me këtë rast”, thuhet në njoftimin e Policisë.

Të nderuar lexues të gazetës “Bota sot”, komentet që përmbajnë fyerje, ofendime dhe sharje nuk lejohen në portal. Andaj, komentet e juaja do të kalojnë në filtra për aprovim dhe të tillat që përmbajnë gjuhë që nuk përkon me rregullat, nuk do të aprovohen. Ju faleminderit.
Sot mund të lexoni Shfletoni kopertinat