Marrëdhëniet ndërmjet Kosovës dhe Serbisë do të shkonin në drejtim të normalizimit nëse Bashkimi Evropian do t'u ofronte përfitimet e anëtarësimit të tij, ka thënë analisti politik Milazim Krasniqi.
“Nëse BE-ja do ta pranonte rajonin, të gjitha problemet do të zgjidheshin automatikisht. Dialogu do të ishte shumë më i lehtë sesa kur këto vende nuk kanë shpresë për t'u bërë anëtarë të Bashkimit Evropian. Arsyeja kryesore, për mendimin tim, mbetet pamundësia e Bashkimit Evropian për të pasur autoritet, forcë dhe vullnet më të madh për t'i afruar këto vende me BE-në”, thotë Krasniqi në një deklaratë për Kosovo-online, transmeton gazeta “Bota sot”.
Ai kujton se Bullgaria dhe Rumania u pranuan në Bashkimin Evropian "brenda natës", megjithëse nuk i plotësuan të gjitha kriteret për anëtarësim.
Ai gjithashtu beson se Bashkimi Evropian duhet të zbatojë praktikën e procedurave të shkurtuara në rastin e vendeve të Ballkanit Perëndimor, veçanërisht në rastin e Serbisë, e cila ka bërë përparimin më të madh në rrugën e saj evropiane.
“Ne e dimë se Bullgaria dhe Rumania, kur u bënë anëtare të BE-së, absolutisht nuk plotësuan asnjë kusht, por u pranuan për arsye gjeopolitike. Serbia edhe pse ka shumë probleme, ka parametra më të mirë se Bullgaria dhe Rumania kur u pranuan në Bashkimin Evropian”, thekson Krasniqi.
Ai gjithashtu thekson se një perspektivë më e qartë e anëtarësimit në BE do të kontribuonte në stabilizimin e situatës në Ballkanin Perëndimor.
“Nëse do të hapej rruga e duhur për anëtarësimin e Serbisë, Kosovës dhe vendeve të tjera të Ballkanit Perëndimor, mendoj se brenda këtyre vendeve do të krijohej një dinamikë tjetër. Meqenëse këto vende e dinë se nuk do të anëtarësohen në Bashkimin Evropian, vazhdojnë me mentalitetin dhe politikat ballkanike që nuk çojnë në dialog, por ndjekin një politikë të tensioneve të përhershme”, ka përfunduar Krasniqi.
