Kryhet me sukses operimi i të plagosurit nga sulmi në Gllogjan, flet gjyshi i tij

Aktuale

Kryhet me sukses operimi i të plagosurit nga sulmi në Gllogjan, flet gjyshi i tij

Më: 27 nëntor 2021 Në ora: 01:01
Musli Turkaj

Musli Turkaj, gjyshi i Fliant Turkajt i cili mbeti i plagosur nga sulmi i armatosur në Gllogjan të Deçanit, ka treguar për ATV-në se nipi i tij është operuar me sukses.

Siç është raportuar, Trukaj ka mbetur i plagosur në këmbë, gjersa vajza pranë të cilës ka qenë i ulur ai, ka ndërruar jetë si pasojë e plagëve të marra.

“Ai është nxënës i Shkollës së Mesme Ekonomike në Gjakovë. Kah është kthyer ka ndodhë ngjarja. Sëpari iu shpreh ngushëllime të gjitha atyre familjeve që i kanë humbur më të dashurit. Flianti ke në operacion. Sipas mjekëve, operacioni u krye me sukses, plumbin ia kanë heq që i ka mbetur në këmbë, po ndihet mirë. Mjekët thanë se tash nuk ka ndonjë problem,” – tha gjyshi i Fliant Turkajt.

Ai ka falënderuar mjekët për kujdesin e treguar ndaj nipit të tij, gjersa shtoi se ka parë prezencë të Policisë së Kosovës, por se nuk është në dijeni nëse nipi i tij është marrë në pyetje rreth ngjarjes.

Theksojmë se të premten, rreth orës 19:00 u raportua për sulm të armatosur që u krye në mes të fshatrave Shaptej dhe Gllogjan të Deçanit.

Një autobus, i cili po transportonte nxënës nga Gjakova për në Gllogjan dhe fshatra të tjera, është sulmuar nga një person i maskuar, ku si rezultat kanë vdekur 3 persona dhe një është plagosur.

I vdekur në vendin e ngjarjes ka mbetur shoferi i autobusit që po i transportonte nxënësit dy prej të cilëve, vajzë dhe djalë të moshës 16-17-vjeç, vdiqën në Spitalin e Pejës.

Të nderuar lexues të gazetës “Bota sot”, komentet që përmbajnë fyerje, ofendime dhe sharje nuk lejohen në portal. Andaj, komentet e juaja do të kalojnë në filtra për aprovim dhe të tillat që përmbajnë gjuhë që nuk përkon me rregullat, nuk do të aprovohen. Ju faleminderit.
Sot mund të lexoni Shfletoni kopertinat