Seanca e jashtëzakonshme për referendumin e Serbisë, partitë opozitare i përgjigjen ftesës së Kurtit

Aktuale

Seanca e jashtëzakonshme për referendumin e Serbisë, partitë opozitare i përgjigjen ftesës së Kurtit

Nga: Bota sot Më: 14 janar 2022 Në ora: 17:32
Kuvendi i Kosovës

(E plotësuar 19:55) - AAK merr pjesë në seancë

Kuvendi i Kosovës përmes një njoftimi për media ka konfirmuar se nesër në ora 14:00 do të mbahet seanca e jashtëzakonshme e Kuvendit ku diskutohet mbi referendumin e Serbisë në Kosovë.

Aleanca për Ardhmërinë e Kosovës do të marrë pjesë në këtë seancë.

Zëdhënësi i AAK-së, Lulëzim Blaka tha se do të marrin pjesë në këtë seancë.

“Po AAK do të marrë pjesë në këtë seancë të jashtëzakonshme”, tha Blaka.

Kujtojmë se PDK-ja përmes një konferencë për media bëri të ditur se nuk do të marrin pjesë në seancën e nesërme ku pritet të diskutohet mbi referendumin serb në Kosovë. Ndërsa nga LDK-ja kanë bërë të ditur se nesër do të mblidhet grupi parlamentar.

​PDK nuk merr pjesë në seancën e jashtëzakonshme në Kuvend, Tahiri tregon arsyet

Partia Demokratike e Kosovës nuk do të marrë pjesë në seancën e jashtëzakonshme që do të mbahet nesër në lidhje me mbajtjen e referendumit të Serbisë në Kosovë.

Nënkryetari i PDK-së, Abelard Tahiri në një konferencë për media, tha se kjo seancë është e panevojshme dhe se mazhoranca po tenton që t'i shmanget përgjegjësisë.

"Qëndrimi ynë tashmë është i njohur, ku mbajtja e referendumit përbën shkelje të sovranitetit dhe integritetin e vendit tonë. Do të dëshironim që qeveria të kishte pasur një koordinim më të mirë me vendet e QUINT-it dhe në veçanti me Shtetet e Bashkuara të Amerikës", tha Abelard Tahiri.

"PDK e sheh krejt të panevojshme mbajtjen e kësaj seance dhe nuk do të marrë pjesë. E konsiderojmë të panevojshme dhe përpjekje për shmangie të përgjegjësisë", ka deklaruar ai.

Kuvendi do të mbajë nesër seancë të jashtëzakonshme, synohet miratimi i kësaj rezolute

Kuvendi i Kosovës do të mbajë nesër seancë të jashtëzakonshme.

Njoftimi është bërë i ditur përmes një komunikate për media, ku është njoftuar se seanca me të vetmen pikë të rendit të ditës: Diskutim në lidhje me synimet e Serbisë për të mbajtur referendum kushtetues në territorin e Republikës së Kosovës, do të mbahet nga ora 14:00.

Njoftimi vjen pas kërkesës së kryeministrit Albin Kurti, i cili ka thënë se synon që seancën e nesërme të miratohet një rezolutë, e cila shfaq vullnetin e Kuvendit për referendumin e Serbisë në Kosovë, përcjell Bota sot.

***

Kryeministri i Republikës së Kosovës, Albin Kurti, i është drejtuar Kryetarit të Kuvendit të Republikës së Kosovës, Glauk Konjufca, me kërkesë për Seancë të jashtëzakonshme të Kuvendit. 

"Në përputhje me nenin 69 paragrafi 4 të Kushtetutës së Republikës së Kosovës dhe nenin 38 paragrafi 2b të Rregullores së Kuvendit të Republikës së Kosovës, kryeministri Kurti i është drejtuar Kuvendit me kërkesë për Seancë të jashtëzakonshme të Kuvendit, për nesër, e shtunë, me datë 15 janar 2022, në orën 14:00", thuhet në njoftimin e lëshuar nga Kryeministria, përcjell Bota sot.

Sipas njoftimit, seanca synon nxjerrjen e një rezolute të përbashkët, ku shprehet vullneti politik i Kuvendit për këtë temë.

"Në rend të ditës së kësaj seance të jashtëzakonshme është diskutimi në lidhje me synimin e Serbisë për të mbajtur referendum kushtetues në territorin e Republikës së Kosovës.

Diskutimi nga kjo seancë ka për qëllim të nxjerrë një rezolutë të përbashkët, në të cilën shprehet vullneti politik i deputetëve dhe grupeve parlamentare dhe Kuvendit të Republikës së Kosovës, mbi çështjen e lartshënuar", thuhet më tej në njoftim.

Image
Kërkesa e Kurtit për Kuvendin
Të nderuar lexues të gazetës “Bota sot”, komentet që përmbajnë fyerje, ofendime dhe sharje nuk lejohen në portal. Andaj, komentet e juaja do të kalojnë në filtra për aprovim dhe të tillat që përmbajnë gjuhë që nuk përkon me rregullat, nuk do të aprovohen. Ju faleminderit.
Sot mund të lexoni Shfletoni kopertinat