Deputeti i LVV-së: Do të pritej prej Listës Serbe të lëshonte seancën për pavarësi, jo prej opozitës shqiptare

Aktuale

Deputeti i LVV-së: Do të pritej prej Listës Serbe të lëshonte seancën për pavarësi, jo prej opozitës shqiptare

Më: 18 shkurt 2022 Në ora: 19:21
Deputeti i Vetëvendosjes, Enver Dugolli

Deputeti i Vetëvendosjes, Enver Dugolli, ka thënë se lëshimi i sallës së Kuvendit nga opozita derisa kryeministri Kurti ishte duke mbajtur fjalimin për 14 vjetorin e pavarësisë, e zuri në befasi.

Ai thotë se një kundërshtim i tillë mund të pritej nga Lista Serbe që ka një mosdurim për shënimet e pavarësisë së Kosovës.

“Ishte një seancë solemne e thirrur për të shënuar në mënyrë të duhur Ditën e Pavarësisë. Besoj që edhe për shumë deputetë të opozitës ka qenë befasi që të lëshohet salla në mënyrë demonstrative, për shkak se e kam parë nga reagimet e tyre që jo të gjithë e kanë mirëpritur këtë. Edhe në partitë opozitare do të ketë debat rreth kësaj. E kemi pritur që Lista Serbe nuk e pranon dot një fjalim apo shënim të Ditës së Pavarësisë, por në asnjë mënyrë s’kemi menduar që edhe opozita shqiptare e bën. Për mua si deputet ka qenë befasi”.

Dugolli në Info Magazine mohon se largimi i opozitës u nxit nga ndonjë pjesë e fjalimit të Kurtit.

“S’është provokuar në asnjë mënyrë, sepse është realitet që tashmë kryeministër është Albin Kurti. Kjo s’ka ndodhur asnjëherë, ka qenë shenjë e keqe”.

Derisa për mospërmendjen e Hashim Thaçit, si kryeministër që lexoi shpalljen e pavarësisë, Dugolli tha se fjalimi i Kurtit përfshinte të gjithë ata që vunë themelin e pavarësisë.

“Bazamenti i Republikës së Kosovës është gjaku i dëshmorëve, sakrifica e Adem Jasharit, rezistenca e brezave të tërë. E gjithë kjo është përmendur”.

Ndërkaq, përmendja e punës qeverisëse në Ditën e Pavarësisë, Dugolli tha se është dashur të ndodhte meqë “lufta për liri dhe pavarësi do të ishte e mangët pa të arritura”.

Të nderuar lexues të gazetës “Bota sot”, komentet që përmbajnë fyerje, ofendime dhe sharje nuk lejohen në portal. Andaj, komentet e juaja do të kalojnë në filtra për aprovim dhe të tillat që përmbajnë gjuhë që nuk përkon me rregullat, nuk do të aprovohen. Ju faleminderit.
Sot mund të lexoni Shfletoni kopertinat