Rastet e sulmeve kibernetike janë rritur së fundmi në Kosovë.
Ndaj këtyre sulmeve thuajse imun nuk është askush, as qytetarët, bizneset e madje as institucionet e Kosovës.
Një përvojë të hidhur me sulme kibernetike e pati edhe Smajl Çekaj, vëllau i komandantit të Ushtrisë Çlirimtare të Kosovës Sali Çekaj.
Ai ka treguar se si në emër të tij është kërkuar para për shërim.
“Po është e vërtetë, më 6 prill kam qenë cak i këtij sulmi. Së pari më është bllokuar faqja e Facebookut dhe Messengeri. Pas disa minutash kanë filluar telefonatat që gjoja se unë kam kërkuar para për mbulimin e shpenzimeve në spital. Dikush në emrin tim ju ka shkruar disa miqve, familjarëve se kinse unë jam i sëmurë me COVID-19 dhe po kërkojë para për shërim”.
Çekaj thekson se nga ky rast viktimë kanë rënë katër persona të afërm duke arritur që t’ua marrin afro katër mijë euro.
“Para në emër timin janë kërkuar nga shumë miq dhe të afërm. Por, si viktimë kanë rënë katër persona. Nga tre prej tyre është arritur të merren nga 1 mije euro derisa njërit 900. Me sa e di deri më tani nuk është identifikuar apo arrestuar askush”.
Vëllau i Sali Çekajt thotë se rastin e ka paraqitur edhe në polici në Deçan dhe në Gjermani.
“Po, në momentin e sulmit kam qenë në Kosovë. Më 6 prill ka ndodhur rasti. Është rikthyer më 7 prill dhe ka funksionuar deri në mbrëmje. Dhe nuk kam arritur ta rikthej derisa kam ardhur në Gjermani”.
“Rastin e kom paraqit edhe në polici në Deçan më 8 prill. Rastin e kam paraqitur edhe në Gjermani”.
Se ka pasur rritje të sulmeve kibernetike kohëve të fundit e konfirmon edhe eksperti i menaxhimit të rrjeteve sociale Valon Kerolli.
Kerolli dha disa këshilla për lexuesit në mënyrë që llogaritë e tyre të jenë në të sigurta.
“Për shkak të sigurisë në rrjete sociale duhet të keni kujdes që asnjëherë të mos pranoni persona të panjohur si miq apo të hapni mesazhe të dërguara nga ta, e sidomos të mos klikoni lidhje/links që iu vijnë me mesazhe në rrjete sociale”.
“Disa nga këshillat kryesore për mbrojtje të llogarisë në rrjete sociale nga hakerët janë: Të përdorni një fjalëkalim të vështirë, të mos e përdorni fjalëkalimin e njëjte në disa vende. Të përdoret autentifikimi i dyfishtë (2FA), të aktivizohen njoftimet me SMS dhe Email. Në rast të kyçjes në llogarinë tuaj nga një pajisje e panjohur, të mbahet privat numri i telefonit ose adresa e banimit apo të moskyçeni në llogaritë e rrjeteve sociale në kompjuterë ose pajisje të huaja”.
