Gërvalla përmend sulmet ndaj Policisë së Kosovës, thotë se po vijnë nga territori serb e Vuçiqi po i lejon
Ministrja e Jashtme të Kosovës, Donika Gërvalla, në mbledhjen e Këshillit të Sigurimit të OKB-së ka përmendur edhe sulmet që po kryhen ndaj Policisë së Kosovës në veri të vendit.
Ajo ka thënë se sulmet po vijnë nga territori serb.
“Ekipet tona të policisë etnikisht të përziera po sulmohen në kufi me armë, gurë, granata e gjithçka tjetër. Fatmirësisht nuk kemi ende asnjë të lënduar”, tha ajo.
Tutje ajo shtoi se këto sulme nuk mund të vinin pa dijeninë e presidentit serb Aleksandar Vuciq dhe se Rusia së bashku me Serbisë kërkojnë destabilizim të Ballkanit.
“Sulmet po vijnë nga territori serb dhe nuk do të ishin të mundura po mos t’i lejonte Vuçiq. Serbia dhe Rusia vazhdojnë të jenë kërcënimi më i madh ndaj paqes në rajon. Nëse nuk e mbyllim Kutinë e Pandorës të hapur nga Dodik, Putin e Vuçiq Ballkani mund të bëhet përsëri vend i errët”, shtoi ajo.
Gërvalla para Këshillit të Sigurimit: Serbia është kërcënimi më i madh i paqes në rajon
Ministrja e Punëve të Jashtme e Kosovës, Donika Gërvalla, në mbledhjen e Këshillit të Sigurimit ka thënë se Serbia është destabiluzues në Ballkanin Perëndimor.
Ajo ka thënë se Serbia është kërcënimi më i madh i paqes në rajon, derisa për këtë e kanë mbështetjen e Moskës.
“Serbia vazhdon të mbetet satelit i Rusisë. Rajoni ynë për këtë vazhdon të mbetet jostabil”, është shprehur ajo.
“Pavarësia e Kosovës ka lindur nga gjenocidi i kryer nga Serbia. Kosova ke rezistuar një kohë të gjatë derisa jemi detyruar që t’i mbrojmë familjet tona dhe në fund erdhi NATO na shpëtoi. Ky gjenocid ka treguar se drejtësia gjithmonë triumfon”.
Gërvalla ka thënë se Kosova asnjëherë nuk i harron viktimat e luftës së vitit 1999.
Këshilli i Sigurimit të OKB-së diskuton për Kosovën, përmenden sulmet e fundit ndaj policisë në veri
Ka nisur mbledhja e Këshillit të Sigurisë së Kombeve të Bashkuara ku po diskutohet për Kosovën.
Përfaqësuesja speciale e Sekretarit të Përgjithshëm dhe kreut të misionit të administratës së përkohshme të Kombeve të Bashkuara në Kosovë, Caroline Ziadeh, ka përmendur faktin se tashmë në Kosovë ka një Qeveri stabile dhe me numrat e mjaftueshëm në Kuvend.
Ndër të tjerash, në fjalën e saj Ziadeh ka përmendur edhe sulmet e fundit ndaj Policisë së Kosovës në veri të vendit.
Ajo ka thënë se në reagimin e saj ka kërkuar nga të dy shtetet që të punojnë së bashku në identifikimin e shpejtë të dyshuarve për sulmin ndaj automjeteve të policisë dhe të përmbahen nga ngritja e tensioneve.
“Beogradi dhe Prishtina e dinë mirë përgjegjësinë time për të ofruar informata për Sekretarin e Përgjithshëm, por UNMIK-u nuk është faktor vendimtar dhe as zëdhënës i asnjërës palë. Shumë shpesh kam dëgjuar situata kur është thënë se UNMIK-u po reprezenton njërën palë ose po bëhet pengesë, apo që po e favorizon njërën palë. Asnjë prej këtyre interpretimeve të pasakta nuk përmban në vete ndonjë të vërtetë, ky nuk është misioni ynë”, ka thënë Ziadeh.
Në fund, ajo ka theksuar se mbështetja e UNMIK-ut ndaj institucioneve të Kosovës do të jetë pjesë e punës së saj, ndërsa ka thënë se fokusi i tyre do të jetë në raport të sigurimit të stabilitetit dhe një paqeje të qëndrueshme.