1176 femra dhe 55 meshkuj, vetëm këtyre u njihet statusi i të dhunuarve në luftën e Kosovës

Aktuale

1176 femra dhe 55 meshkuj, vetëm këtyre u njihet statusi i të dhunuarve në luftën e Kosovës

Më: 21 maj 2022 Në ora: 10:17
Ilustrim

Sipas statistikave të publikuara në Kosovë, janë mbi 20 mijë viktima të dhunës seksuale gjatë luftës së fundit.

As 23 vjet pas luftës dhunuesit e këtyre viktimave nuk janë sjellë para drejtësisë.

Për këto viktima, Kosova ka filluar në vitin 2018 procesin e verifikimit të statusit të viktimave të dhunës seksuale gjatë luftës së viteve 1998-1999.

Edhe pse kanë kaluar 4 vjet nga hapja e aplikimit për statusin, numri që kanë aplikuar për njohje të këtij statusi është i vogël.

Në një përgjigje nga Komisioni Qeveritar për njohjen e statusit të viktimave të dhunës seksuale kanë thënë se deri tani kanë aplikuar gjithsej 1699 persona.

Statusin viktimë e dhunës seksuale e kanë fituar 1 mijë e 231 persona nga ta 1 mijë e 176 femra dhe 55 meshkuj.

Numri i aplikuesve deri më tash është 1699, statusin viktimë e dhunës seksuale e kanë fituar gjithsej 1231 persona nga ta 1176 femra dhe 55 meshkuj”, thuhet në përgjigjen e Komisionit.

Lidhur me numrin e vogël të aplikimeve për këtë status, ka folur sociologia Teutë Rrusta, e cila ka treguar asryet pse viktimat hezitojnë të aplikojnë.

Rrusta thotë se gratë e kanë të vështirë ta pranojnë statusin e viktimës në një shoqëri patriarkale dhe konservatore.

“Morali dhe traditat ende në Kosovë janë shumë të forta edhe me një shoqëri patriarkale dhe konservatore është tejet e vështirë që gratë të pranojnë me shkua dhe me u shkruar si viktima të dhunës seksuale, ky problem mbetet mbas luftërave sepse stigmatizim i këtyre grave dhe familjeve të tyre rëndon mbi to, unë do ja kisha dhënë një kritik shoqërisë për mënyrën se si e kanë trajtuar dhunën seksuale gjatë luftës nëse ne si shoqëri e kishim tejkaluar këtë moralizim kjo nuk kish mundur me u përdor as si armë e luftës”, u shpreh Rrusta.

Sipas sociologes, edhe nga deputetët e Kuvendit është bërë një dëm i madh kundrejt viktimave të dhunës seksuale.

“Është edhe një dëm që ju është bërë viktimave të dhunës seksuale se kur është trajtuar kjo çështje në kuvend mënyra se si deputetët e kanë trajtuar duke kërkuar ekzaminim, dëshmi kur dikush e merr statusin për përfitim e mashtrim të këtij lloji e ne në fakt e kemi problemin tjetër që ka mungesë shumë të madhe të aplikimit”, potencoi ajo.

Çështja e viktimave të dhunës seksuale gjatë luftës është riaktualizuar në kohën e presidentes Atifete Jahjaga, e cila për ta ndihmuar këtë kategori të shoqërisë, në atë kohë krijoi Këshillin Kombëtar për të Mbijetuarit e Dhunës Seksuale, të cilin e udhëhoqi vetë.

Në bazë të ligjit, atyre që u njihet statusi i viktimës së dhunës seksuale gjatë luftës, përfitojnë benificione personale prej 230 euro në muaj.

Me legjislacionin në fuqi procesi i aplikimit është i hapur deri në muajin shkurt të vitit 2023.

Të nderuar lexues të gazetës “Bota sot”, komentet që përmbajnë fyerje, ofendime dhe sharje nuk lejohen në portal. Andaj, komentet e juaja do të kalojnë në filtra për aprovim dhe të tillat që përmbajnë gjuhë që nuk përkon me rregullat, nuk do të aprovohen. Ju faleminderit.
Sot mund të lexoni Shfletoni kopertinat