Deputeti Gashi obligohet të heqë dorë nga biznesi i “servisit të veturave”

Aktuale

Deputeti Gashi obligohet të heqë dorë nga biznesi i “servisit të veturave”

Më: 24 maj 2022 Në ora: 11:23
Fadil Gashi

Agjencia Kundër Korrupsionit ka mbyllur rastin për deputetin nga komuniteti rom, Fadil Gashi, i dyshuar për konflikt interesi.

Gashi është detyruar të zgjedh në mes pozitës së deputetit dhe drejtuesit të një kompanie private.

Vendimi nga AKK-ja është firmosur më 13 maj, nën arsyetimin se Gashi është person i autorizuar në biznesin “Fadil Me. Gashi B.I” dhe në të njëjtën kohë ushtron mandat prej deputeti, që sipas ligjit në fuqi mund të përbëjë konflikt të mundshëm interesi.

Agjencia e ka njoftuar Gashin se kanë filluar procedurat për shqyrtimin e mundshëm të konfliktit të interesit.

Kësisoj, deputeti Gashi është pajtuar me gjetjet e Agjencisë. I njëjti ka ndërmarr veprimet e menjëhershme dhe më nuk figuron si person i autorizuar në kompaninë, e cila merret me mirëmbajtjen dhe riparimin e automjeteve.

“Pas diskutimit dhe ballafaqimit të fakteve, zyrtari i lartë z. Fadil Gashi është pajtuar me gjetjet e Agjencisë, duke deklaruar se do të ndërmarrë veprime të menjëhershme dhe konkrete në mënyrë që të shmang papajtueshmërinë në ushtrimin e funksionit publik”, thuhet në vendim.

Megjithatë, sipas faqes së ARBK-së, kompania “Fadil Me. Gashi B.I”, e cila operon në Mitrovicë, është hapur më 2019.

AKK-ja në vendimin e saj ka thënë se rasti mund të rihapet në çdo kohë, nëse paraqiten rrethana të reja.

Të nderuar lexues të gazetës “Bota sot”, komentet që përmbajnë fyerje, ofendime dhe sharje nuk lejohen në portal. Andaj, komentet e juaja do të kalojnë në filtra për aprovim dhe të tillat që përmbajnë gjuhë që nuk përkon me rregullat, nuk do të aprovohen. Ju faleminderit.
Sot mund të lexoni Shfletoni kopertinat