Ministrja e Arsimit, Shkencës, Teknologjisë dhe Inovacionit, Arbërie Nagavci ka pritur në takim presidentin e EQAR-it, Karl Dittrich dhe drejtorin e EQAR-it, Colin Tuck. E para e arsimit kosovar u shpreh se janë të angazhuar në rikthimin e Agjencisë Kosovare të Akreditimit (AKA) në EQAR, ndërsa presidenti i këtij institucioni u shpreh optimist se AKA me punën që po e bënë mund t’i bashkohet EQAR-it dhe ENQA-së.
Nagavci u shpreh se kthimi në ENQA dhe në EQAR është synim nacional sepse në këtë mënyrë rritet cilësia e arsimit të lartë.
Nagavci: Kemi garantuar pavarësi institucionale dhe kemi larguar pengesat tjera
“Ne kemi garantuar pavarësinë institucionale të Agjencisë Kosovare të Akreditimit, kemi finalizuar Ligjin për Agjencisë Kosovare të Akreditimit e kemi votuar të njëjtin në Qeveri dhe e kemi dorëzuar në Kuvend, duke marr parasysh mendimet e të gjithë hisedarëve unë konsideroj se kemi dërguar një draft shumë të mirë të ligjin për të cilin morëm konfirmim dhe lëvdata edhe nga presidenti i ENQA-së. Në anën tjetër kemi siguruar edhe përmbushjen e kritereve tjera siç sigurimi i objektit modern me mbi 1 mijë metra katror, për AKA, dhe kemi planifikuar buxhet të mjaftueshëm dhe kemi përkrahur të gjitha programet e AKA-së dhe po e ndihmojmë Agjencinë në rritjen e stafit. Kemi eliminuar të gjitha pengesat burokratike për zhvillimin e AKA-së. Edhe vetë Agjencia ka bërë hapa përpara ka respektuar të gjitha obligimet dhe detyrat të cilat i ka përcaktuar në planin dinamik duke zbatuar edhe rekomandimet e ENQA-së“, theksoi Nagavci.
Kurse, presidenti i EQAR, Karl Dittrich u shpreh se kanë parë përparime të jashtëzakonshme dhe shpreson që për një kohë të shkurt Agjencia Kosovare e Akreditimit do t’i bashkohet ENQA-së dhe EQAR-it.
Dittrich: Kemi parë përparime të jashtëzakonshme
“Ne kemi parë përparim të jashtëzakonshëm dhe kjo është e rëndësishme, jo vetëm për shkak të arsimit të lartë, por sigurisht për shkak të së ardhmes së këtij vendi dhe popullsisë së tij shumë, shumë të re... Jemi shumë të kënaqur me projektligjin që kemi diskutuar dje me deputetët. Ne kemi diskutuar me organizatat e tjera të interesit në Kosovë, kemi diskutuar me agjencinë për çështje të cilësisë, jemi absolutisht të bindur se me punën që po bën Agjencia për momentin, do t’i rris gjasat, që AKA të jetë anëtare e ENQA dhe EQAR në një kohë të shkurtër. Pra, ne presim me optimizëm drejt së ardhmes dhe shpresojmë që të përqafojmë Kosovën dhe AKA-në sa më shpejt që të jetë e mundur si miq në Evropë dhe si partnerë që kanë qenë në të kaluarën, por edhe kanë qenë partnerë të mirë... Ne shohim shumë përmirësime, jemi shumë optimistë dhe shpresojmë që kjo të përfundojë dhe të shpaguhet me anëtarësimin e plotë në ENQA dhe regjistrimin e AKA-së në regjistrin tonë në EQAR”, u shpreh Dittrich.
Presidenti i EQAR-it, Karl Dittrich dhe drejtori i EQAR-it, Colin Tuck gjatë ditës së djeshme janë takuar edhe me anëtarët e Komisionit parlamentar për Arsim, por edhe me shoqërinë civile.
Agjencia e Akreditimit të Kosovës që nga viti 2018 është përjashtuar nga Regjistri Evropian për Sigurimin e Cilësisë në Arsim të Lartë (EQAR).
