Deliu i reagon Muratit: Krejt sakrificën e luftëtarëve, e paska minuar në kontribut të njëjtë me mercenarët

Aktuale

Deliu i reagon Muratit: Krejt sakrificën e luftëtarëve, e paska minuar në kontribut të njëjtë me mercenarët

Më: 30 qershor 2022 Në ora: 00:05
Blerta Deliu

Deputetja e PDK-së, Blerta Deliu, ka reaguar pasi në rrjete sociale është shpërndarë një postim i ministrit të Financave dhe Transfereve, Hekuran Murati.

Në postimin që ka datën e vitit 2016, Murati kishte deklaruar se pagesat e pensioneve për ish-veteranët e luftës së Ushtrisë Çlirimtare të Kosovës po i kushtojnë buxhetit të Kosovës më shumë se buxheti për Ushtrinë.

Ai kishte shkuar edhe më tutje duke thënë se po të kishte angazhuar Kosova mercenarë gjatë luftës, do t’i kushtonte më pak se sa pensionet e veteranëve.

E për këto deklarata, deputetja e PDK-së, Blerta Deliu ka deklaruar se nuk ka asgjë që e kompenson luftën e djemve e vajzave tona për liri.

“Krejt sakrificën e tyre deri në vetmohim, ministri Murati e paska minuar dikur në kontribut të njëjtë me mercenarët. Sa turp!”, ka shkruar Deliu në Facebook.

Kujtojmë se ndaj ministrit Murati ka reaguar edhe përfaqësuesi i OVL-UÇK-së, Faton Klinaku, i cili ka deklaruar se nëse zyrtarët shtetërorë “nuk marrin vesh, do të kërkohet dorëheqja e Qeverisë dhe jo vetëm e ministrit”.

Të nderuar lexues të gazetës “Bota sot”, komentet që përmbajnë fyerje, ofendime dhe sharje nuk lejohen në portal. Andaj, komentet e juaja do të kalojnë në filtra për aprovim dhe të tillat që përmbajnë gjuhë që nuk përkon me rregullat, nuk do të aprovohen. Ju faleminderit.
Sot mund të lexoni Shfletoni kopertinat