Eksperti amerikan: Ajo që ndodhi në veri të Kosovës nuk është befasuese

Aktuale

Eksperti amerikan: Ajo që ndodhi në veri të Kosovës nuk është befasuese

Nga: A.ZH Më: 7 gusht 2022 Në ora: 19:01
Një ushtar i NATO-s duke ecur pranë kamionëve që serbët lokalë kanë përdorur për ta bllokuar një rrugë drejt kufirit mes Kosovës dhe Serbisë.

Eksperti amerikan për politikën dhe çështjet e Ballkanit në Universitetin e Nju Jorkut, Alon Ben-Meir, ka thënë se tensionet e fundit në veri të Kosovës me Serbinë, nuk ishin befasi.

Ai ka thënë se serbët e Kosovës gjithmonë kanë tendencë për të sfiduar institucionet e Kosovës.

“Ajo që ka ndodhur në veri të Kosovës nuk është befasuese. Gjithmonë ka pasur një tendencë në mesin e kosovarëve serbë për të sfiduar qeverinë”, ka thënë Ben-Meir, në një postim në Facebook, përcjell Bota sot.

Ai ka thënë se pas vendimit të kryeministrit Albin Kurti, për shtyrjen e masës së reciprocitetit për një muaj, Kosova dhe Serbia duhet të gjejnë një zgjidhje përmes dialogut.

“Tani që bllokadat e rrugëve janë hequr dhe kryeministri Kurti ka pezulluar kërkesën e tij për reciprocitet për një muaj, të dyja palët duhet të tregojnë fleksibilitet dhe të negociojnë një zgjidhje më të përhershme përmes dialogut, të sponsorizuar nga BE-ja”, ka shtuar ai.

Qeveria e Kosovës, ka shtyrë zbatimin e dy vendimeve për dokumentet dhe targat serbe, që çuan në bllokimin e rrugëve në veri të Kosovës nga serbët lokalë gjatë vikendit.

Sipas kërkesës së SHBA-së, vendimet do të fillojnë të zbatohen nga data 1 shtator./Botasot

Të nderuar lexues të gazetës “Bota sot”, komentet që përmbajnë fyerje, ofendime dhe sharje nuk lejohen në portal. Andaj, komentet e juaja do të kalojnë në filtra për aprovim dhe të tillat që përmbajnë gjuhë që nuk përkon me rregullat, nuk do të aprovohen. Ju faleminderit.
Sot mund të lexoni Shfletoni kopertinat