Kryeministri i vendit, Albin Kurti, ka thënë se marrëveshja e arritur dje në Bruksel, nuk është marrëveshje për targat.
“Marrëveshja e mbrëmshme s’është marrëveshje për targat, ne u morëm vesh që t’i ndalojmë veprimet në mënyrë reciproke pra nuk do të bëjmë gjobitje për targat KM dhe do t’i japim hapësirë negocimit të propozimit evropian që më herët quhej franko-gjerman”.
Ai tutje tha se po e quan evropian pasi më 11 nëntor kur takoi Lajçakun dhe Borrellin në Paris, ky i fundit ka reaguar ashpër kur kryeministri e ka quajtur propozimin franko-gjerman.
“Po e quaj evropian se më 11 nëntor kur e kam takuar në Paris, Borrellin dhe Lajçakun, unë kur thash franko-gjerman ai reagoi bukur ashpër dhe tha është propozim evropian, unë thash në rregull, i kërkova falje. Mirëpo unë të hënën e pashë që është franko-gjerman, se po të ishte evropian ai s’do ta braktiste aq kollaj”, shtoi Kurti
