Ministria e Industrisë, Ndërmarrësisë dhe Tregtisë ka zbuluar se cili është “projekti gjigand” për të cilin paralajmëroi nënkryetari i Komunës së Prishtinës, Alban Zogaj.
Përmes një postimi në faqen zyrtare, MINT ka njoftuar se kompania gjermane “MUNDA”, që merret me zhvillimin dhe prodhimin e tapicerive dhe tekstileve për industrinë e automobileve, është regjistruar si biznes në Kosovë.
Sipas njoftimit të MINT, nga ky investim do të happen 200 vende të reja pune.
“Investimi i kompanisë Munda në Kosovë përveç 200 vendeve të reja të punës do të sjell edhe përvoja në fushën e tekstileve teknike me njohuritë e teknologjisë së ndriçimit të bazuar në LED.
Një teknologji e re kjo që krijon mundësi krejtësisht inovative. Ministrja Hajdari i njoftoi përfaqësuesit e Munda-së për lehtësirat që i kanë ndërmarrë përmes plotësimit të legjislacionit që ndihmon qasjen e investitorëve në Republikën e Kosovës”, thuhet në njoftim.
