Para dy muajsh në Kaçanik të Vjetër u vra me breshëri plumbash në veturën e tij ish-ushtari i UÇK-së Nysret Cena, 48-vjeçar. Deri më tani nuk është njoftuar për identifikimin e as arrestimin e ndonjë të dyshuari për vrasjen e tij. Por, ky rast tashmë ka kaluar në kompetencë të Prokurorisë Speciale Republikës së Kosovës.
Këtë informacion e ka konfirmuar zëdhënësja e Prokurorisë Themelore të Ferizajt, Vjosa Baftiu.
“Referuar pyetjeve tuaja, ju njoftojmë se ky rast ka kaluar në kompetencë të Prokurorisë Speciale të Republikës së Kosovës (PSRK). Andaj, për informata lidhur me këtë rast, ju lutem drejtohuni tek kjo prokurori”, tha Baftiu.
Deri ku kanë shkuar hetimet për vrasjen e ish-ushtarit të UÇK-së, media është në pritje të një përgjigje nga PSRK.
Policia u informua me datën 23.01.2023 rreth orës 23:50 se në një automjet në rrugën magjistrale Ferizaj–Kaçanik, në Kaçanik të Vjetër ndodhej i vrarë Nysret Cena.
Po atë natë, policia kishte pranuar një informacion tjetër se në fshatin Soponicë të Kaçanikut afër autostradës një automjet tjetër i udhëtareve ishte përfshirë nga flaka.
Por, jo larg vendit të ngjarjes në fshatin Soponicë të Kaçanikut është gjetur edhe një automjet tjetër i udhëtarëve i përfshirë nga flak.
Sipas policisë, ekziston dyshimi se personat e dyshuar pasi e kanë kryer vrasjen në Kaçanik të Vjetër i kanë vënë flakën automjetit dhe janë larguar.
“Nga hetimet e para, ekzaminimit të vendit të ngjarjes dyshohet se personi/persona të panjohur në Kaçanik të Vjetër nga afërsia kanë shti breshëri plumbash mbi automjetin dhe shoferin e më pas janë larguar nga vendi i ngjarjes në drejtim të panjohur”, ka konfirmuar policia.
Media në vazhdimësi ka raportuar për vrasjen e 48-vjeçarit.
Kryeprokurori Shukri Jashari zbuloi se targat e veturës Mercedes e cila u gjet e djegur pasi u vra Nysret Cena, janë identifikuar se i takojnë një veture të tipit Passat.
Kryeprokurori i Prokurorisë Themelore të Ferizajt, Shukri Jashari, kishte deklaruar se pronari i targave të veturës Passat që u gjetën të vendosura në veturën e djegur Mercedes, është intervistuar dhe i njëjti kishte deklaruar në polici vjedhjen e targave të veturës së tij më 10 nëntor 2022.
“I njëjti më 10 nëntor 2022 e ka lajmëru në polici që ju kanë vjedhë targat e veturës, ka dhënë deklaratë edhe atëherë. Vetura ka qenë e parkuar para banesës në Prishtinë, personi ka qenë në punë e ka lajmëru rastin në polici. Ai edhe në nëntor e ka dhënë të njëjtën deklaratë”, ishte shprehur Jashari.
Ai shprehej se prokuroria po zhvillonte hetime intensive për zbardhjen e këtij rasti.
Nysret Cena ishte emër i njohur për organet e drejtësisë. Ai ishte i akuzuar për dy raste, por që më pas ishte liruar nga akuzat.
Cena akuzohej për shpërthimin që kishte ndodhur në vitin 2007 në lokalin “Sekiraqa” në Prishtinë.
I njëjti së bashku me dy persona tjerë ishte i akuzuar për vrasjen e trefishtë afër Kaçanikut, ndodhur në vitin 2007, por që ishte liruar edhe nga kjo akuzë.
